初次見面

夏生今天(晚)不回家，夏太就有晒籍口去搵余生。我就梗係奉陪到底，仲可以見下Summer Baby。「你好喔! 你快啲出世比我正式見下你啦!」

今次夏太仲有特別任務，就係做我地榮譽顧問。終於晌佢精明領導下，解決左我地大日子流程問題。人地通常有兩手準備，夏太竟然比左「9」手準備我地，真係唔單只pro咁簡單!

咁啱小巨人可以放早(9點算係放早嗎?)，比佢撞破左我地兩女去搵余生。平時同余生唔啱口型嘅佢，都要黎趁下熱鬧。所以我一定要比個紀念佢... 同「元氣壽司碟」合照一張! 呵呵!

雙子星生日會

好耐都無同舊同事們見面，仲要係齊人嗰隻。難得今次同一日生日嘅雙子星--劉生同花姨自動獻身，我地又點會放過呢個機會聚一聚，咁我地就決定攪一圍「鮑參翅肚」樣樣齊壽宴賀一賀佢地。



就黎做爸爸嘅劉生仍然係咁大細路，我地笑佢第時會同劉baby爭機打，或者會同劉baby一齊打機打到唔停手都未定。我地都好期待見到好可愛嘅劉太同仍然晌媽媽肚入面嘅劉baby，不過劉太要返學，可能要到劉baby出左世先見到佢地。而之前受左重傷嘅花姨仍然休養中，精神都比之前好左好多，咁都令人放心啲，祝佢早日康復、身體健康、人比花嬌。

來一杯

有一段時間希望可以離開佢，但係最後兜兜轉轉仍然返到佢身邊。

不過我都控制自己，每日只可以見佢一次。每日時間一到，我會好好珍惜我倆相聚嘅每一分鐘，不受旁人打擾。

或者，我真係好懷念初次見面，同佢一齊晌沙灘對住無敵大海景同美麗夕陽嘅美妙時光。

我愛我的coffee break!

好彩

嘟嘟姐最後都唔可以黎香港，咁最後決定派阿仔去法國啦! 經過呢件事，佢會發覺依家晌公司有3個阿媽... 真幸福。自從轉左依家個team同加埋阿仔之後，我地做野好開心，所以大家都好關心各隊員。

因為都係今個星期一先決定阿仔去法國，而且要佢星期四就飛，所以真係好急，急到連機票都差啲揾唔到! 所以依家佢上到機已經抹一把汗! 真係要祝佢一路順風。

我都好好彩，因為寶寶去左英國同瑞典視察業務，嘟嘟姐又要同阿仔傾野，所以我去到都無人理，今次可以免疫。如果唔係，星期六就會無得去睇相... 好彩好彩!

霸頭位

今日霸頭位行動失敗左，所以成朝都聽到小巨人嘆氣... 因為我地攞到第17號籌咋。

我唯有又去揾鄭中基! 其實依家都唔係咁差，起碼仲有位，又唔洗通宵排隊。如果我地唔要，仲有10對人晌後面多謝我地 (嘻嘻)! 如果到時揀時間都係唔啱心水，再去揾律師都ok啦! (呢排「鄭中基」做左我偶像!)

好似啲餅卡咁，今日已經搵到啦! 仲有未來錢太話佢又有辦法買到唐餅卡，仲已經幫我攪掂埋，真係好感動。我幫唔到佢仲要佢照顧埋我... 真係要拍拍心口同大叫「好安塔」! 哈哈!

人迫人

今日去左電腦展，簡直係盛況空前，好多人呀! 迫到行唔到!

不過無埋由入到去唔買野架(籍口) ... 好彩我地都有收穫。除左幫Kiki同Koko買左記憶卡同手指之外，小巨人終於扑搥買左「三哥」電視。不過好重呀!

不經不覺我地行左4個鐘，跟住就要入場去婚紗展。我地今日目標係買餅卡，點知... 無呀! 人地無擺呀! 點算好? 一等要等到11月呢! 好徬徨... 都係我唔好。唉! 連未來錢太交比我做嘅事都幫唔到佢。好失落!

不過學鄭中基講:「辦法梗有嘅! Think postive!」返到秘密機地又諗到辦法，所以仲有希望! 依家都係收拾心情，投入作戰準備，因為聽朝要擔櫈仔、霸頭位!

細路仔 玩泥膠

今年Kiki生日會又黎啦! 有美味芒果蛋糕、果汁任飲同Kiki Daddy嘅茶餐廳級數公仔麵。當然仲有最開心嘅收禮物時間! 見到男子組咁興奮，梗係打機時間啦!





我送比Kiki嘅禮物係佢特別order，就係「點滴魔法珠」。我地除左合力做左隻鴨仔之外，佢仲送左個閃令令水晶特別版電話比我... 嘻嘻!



今年好益智，我地做左小朋友，排排坐玩泥膠，而且仲唔停得手。最後，我地嘅完成品當然要黎個大合照! Kiki個完成品... 佢話係一個「西瓜波」，所以我比左阿軍曹佢地「頂住」!

生日送大禮

蘇小弟:「攞去用啦...」
我:「嘩! 係特別版Post Pet結婚公仔呀! (扮驚喜...)」

回想起第一次見到呢對Post Pet嘅感覺:「好得意呀」、「貴野」、「唔捨得買」、「又唔見你個衰仔買比我」...

其實佢地已存在晌屋企有一段時間，原本係蘇小弟買比好朋友嘅結婚禮物。不過因為有突發事件，原來主人唔能夠收留佢地，最後蘇小弟孝敬左比我。(妄想地) 我真係懷疑其實佢係比驚喜我架... 真鬼馬!

聽日係蘇小弟生日，本來呢日黃金時間佢要返夜更。點知又突然改左，可惜晌佢改之前我又約左人，所以無緣同佢晌「正日」開生日派對，唉! 點解佢唔早啲話我知架...

佢生日竟然掉返轉送禮物比我! 真感動! 嘻嘻!

又變

出trip途中收到通知，最後決定由嘟嘟姐親自出馬監督下年度新野。我同馬田總管梗係拍掌歡呼。因為我地可以唔駛山長水遠去法國。其他人以為好筍... 其實晌公司同事都知道「不無之地」嘅生活唔係講笑。

原本已經確定好晒，每日議程亦已經為嘟嘟姐做好晒... 點知今日又收到小道消息話可能有變。因為嘟嘟姐又病左。唉! 攪到依家啲野都唔知點做好...

不過希望嘟嘟姐快啲好返，可以快啲去「溫磨、吐磨...」

等什麼?

等... 放工!
等... 巴士!
等... 返屋企!
等... 見蘇太太!
等... 食晚飯!
等... 沖涼!
等... 睇電視!
等... 講電話!
等... 瞓覺!

仲有咩要等?

梁豹壽宴

不經不覺已經晌同一間公司工作左兩年咁耐。

最幸運係比我認識到一班同事們，我由初時只係同他他、小神童相依為命。到左兩年後嘅呢個時候，已經係一呼百應。佢地玩得、飲得、癲得、又唱得，所以不時進行精彩嘅聯誼活動。

仲有唔少得特別鳴謝我的FA Project榮譽顧問: 豹豹! 多得佢皇恩浩蕩，我可以參加佢個《梁豹壽宴》。

生日快樂!

下半場

相隔兩個月嘅下半場終於攪掂，真係舒服晒。

因為擔心又落雨，所以起身第一時間睇下有無事。結果天公造美，我同小巨人就快快樂樂出門口啦! 有上半場嘅經驗，今次比上一次輕鬆得多。所以我地都好順利完成今次mission! 影完成個過程之後，我竟然大叫「yeah!」左出黎! 哈哈!

今日仲約左錢氏伉儷去左eden睇環境，仲有去酒樓一齊揀帖。好開心，因為有錢氏伉儷同我地一齊作戰，感覺有戰友一齊努力真係唔同啲。不過，錢生又問左我大家都好關心嘅一個問題...

「其實你地有咩係攪左架?」

柯柏文

今日有偷返黎嘅半天假，我當然爭取時間，全部時間都用黎「瞓」，因為我實在太攰啦!

不過呢幾日朦朦朧朧嘅我，連小巨人放假都唔記得，結果令佢信心盡失。因為佢發現到，佢對我嘅吸引力完全比唔上「周公子」! 梗係唔係啦(口講)，為表我誠意，我地去左睇戲。點知又差啲攏烏龍，我仲以為佢想睇「叛諜追擊」，點知佢係話「變形金剛」... 死未! 好彩未買飛!

兩套比我揀，我梗係揀柯柏文啦! 話晒佢陪住我地過快樂童年。蘇小弟都有一個柯柏文架，我仲記得成日見佢自己晌度配音「銀牙、銀牙」。好細個嘅時候，我真係以為: 柯柏文=好型，所以一定要捧場呀!

套戲好好睇。我好開心，因為柯柏文仲係咁型囉! 哈哈!

心花怒放

我今日收花呀... 呵呵呵!

其實係蒙蒙送比我為星期日下半場準備嘅神秘禮物。我好鐘意呀! 見到咁鮮豔嘅顏色已經令人心花怒放。不過又落雨啦! 唔知會唔會落到星期日呢?

如果係的話，下半場又要延後... 真係令人擔心! 不過好彩，蒙蒙已經為花花施左魔法，我地幾時開始下半場都無問題。

特別任務在浙江(5)

今日係最後一日行程，終於可以返屋企啦! 上海天氣非常好，天朗氣清，令人有好精神嘅感覺，沿途都感受到呢個城市嘅活力。





食完午餐之後，我地就出發去機場，團友們心情都好愉快。原本預計用3個鐘頭去機場，不過今日交通順利，個半鐘已經安全抵達。係時候同服務左我地5日嘅司機叔叔講再見，原來我地呢5日行左1千4百公里，好厲害!




上海機場好大同好靚，真係國際級。不過原來好戲在後頭...



因為我地一班機delay左，安排給人感覺非常混亂。不論晌上海上機同深圳落機都係，呢一件事真係呢次旅程嘅污點。數數手指，由到上海機場到秘密機地，足足攪左9個鐘，返到秘密機地已差不多十二點。超攰!

特別任務在浙江(4)

今日我地由農村(永康)走到現代都市(上海)，各團友都有啲攰，因為車程用左5個鐘頭。

朝早仲有驚險事，我同翠斯由酒店餐廳上返房攞行李時，竟然遇上停電。四圍漆黑一片，好彩好快就有人拯救我地。但係已經嚇死我，真係多謝翠斯嘅安慰。之後見到同海倫有八分似樣嘅新抱仔，我地就出發去農村。



食午餐嘅時候，新抱仔仲款待左我地去「老爺的農莊」，風景真係一流。竟然有山、有湖、有狗、有雞、有羊、仲有矛屋仔! 食完飯我地又要去上海啦!




今日行程比想像中長好多，我地由下晝2點半出發，8點先去到上海，真係坐都坐到雙腳抽筋。不過遠離城市幾日，見到立即醒晒! 見到大大大個摩天輪同體育館，仲有五光十色嘅街景同成日塞車嘅馬路。




我同翠斯係第一次去上海，所以西門爺爺同馬田主管帶左我地去上海外灘，風景真係好靚呀！但係好多人，同香港睇煙花前差唔多。




晌上海第一次用餐，西門爺爺帶左我地去「鷺鷺酒家」，仲介紹左好多上海地道野比我地，當然仲有「賣飛佛」小籠包。好味!