好抵食

今日同巨人之家食晚飯，呢餐好抵食，因為係巨人爸爸加巨人媽媽生日，仲包埋父親節同母親節架(咁都得?!)!

對我地無微不至嘅巨人媽媽，己經準備左好多「糧餉」比我地帶返屋企。我有理由懷疑，嗰一大盆咖哩雞係小巨人自己特別要求的，因為真係好大盆呀。今次仲有肉餅同香矛豬扒，全部都係小巨人至愛同巨人媽媽最拿手的。

巨人爸爸媽媽對我地真係好好呀! (原來我地先係最抵食... 又食又拎!) 好野! 我又有幾日唔洗諗煮咩...可以快快趣開飯。

林兔

琴晚去左睇林狗了，不過佢今次做左「林兔」。每人入場都可以有一雙小兔耳仔，加埋個舞台亦十分cutie，令全場都可愛起黎。

雖然只有三面台，舞台又細細，但係全場爆滿的威力真係勁，因為一齊哈哈大笑的笑聲，已經好震撼。我覺得比上次晌會展的好睇，又好笑啲。


原來好戲還在後頭，因為有阿葛呀!!! 哈哈哈! 事前唔知道有阿葛，所以好興奮。佢地造型非常攪笑，仲有新組合名叫「高山青龍」。(張相係上網搵的)


點知今日睇到報紙，話阿葛做完琴晚個show之後，因為疲勞過度個心唔舒服，仲入左醫院，之後都唔會演出剩返嗰幾場。真係太可惜啦... 要快啲好返呀!

慈父

為娜娜準備好一啲小禮物好耐了，點知仍然原封不動晌窗台上的一角。原來係小巨人想黎個「互動」，送一幅填好顏色嘅圖畫比阿女。

難得佢有呢個鬼馬主意，所以我地又要從包好的包裹解封過來。以佢一貫作風，一定有拖無欠... 由佢想像到實行呢個動作，大約一個月左右。不過，今日我終於同佢合作完成了。

自從助養左娜娜之後，小巨人成日都提住「我個女」，好有慈父feel (哈哈)。

鬼線人

自從小巨人開始用番錄影機，我地就成日睇電視。以前小巨人已經話要推介比我的「鬼線人(Medium)」，依家連我真係被感染啦。劇情緊張剌激，真係好好睇呀!

小巨人仲同我講係真人真事黎架... 不過下星期已經係season final，唔知又要等幾耐。

咁好彩?

今日蘇碧同蘇小弟打比我，話佢地加埋小健中獎了...
仲要係上次排隊都買唔到的「林海峰是但嗡求其大合唱PART 2」。
因咩事大家咁好彩? 原來係我地上次同蘇太太食飯之後的傑作!
因為青衣城有得抽獎，真係估唔到大家都咁lucky!

不過佢地都有幫我填飛仔抽獎架，我地四個人中左三個呀!
嘩! 原來我係「唔好彩」的一個。
好彩都有得去睇... 嘻嘻嘻!

外星話

(晴晴洗完白白，換套新衫仔... 靚晒!)

一放工就立即去左夏太屋企探晴晴。依家晴晴開始講外星話，好似好想同我地傾計咁。不過佢好醒目，一影video就唔出聲架啦。晴晴真係好得意，真係要上去同佢玩多啲呀!

夏太仲「醒」左幾本「秘笈」比我，真係要努力惡補下。

精靈臻臻

今日蔡太帶左臻臻去影樓影相，我當然第一時間睇下成果。真係好想尖叫一下，臻臻除左越來越似媽咪之外，越睇就越似bb poster內的bb，肥嘟嘟、面圓圓、眼大大，真係超精靈同人見人愛。



其實臻臻最靚嘅一張相係同daddy、mummy一齊影的，見到佢地一家人咁開心，真係幸福。

好期待臻臻聽日黎我家... come on baby!

傷感的一週

這個星期很傷感，因為在星期一(五月十二日)下午的時候，中國四川發生了一場破壞力驚人的大地震。電視上不斷傳來當地災情的畫面: 房子倒塌了、到處也是頹垣敗瓦、孩子沒有了爸媽、爸媽也沒有了孩子，令人傷心得很。

每當看有關這場地震的消息，我都紅了眼，特別是看到總理安慰著一個不斷哭的小女孩... 真的忍不住了。幸好，小女孩的姐姐看到妹妹的新聞，她們終於相認。

在差不多地震的一刻，我看過時間，也記得當時正在和小巨人小小冷戰中。現在想起，發現自己多麼無聊，沒想到大災難正在降臨的時候，我還做這些沒意義的事。新聞報導提到，香港是中國少數不在地震帶的城市，我們真的是幸運的一群。

惜福，珍惜身邊所有的。

不醉無歸

又來一個大聚會，因為係一姐生日呀! 本想連寶寶生日也一併來起個「孖寶生日會」慶祝一番，不過來不及，佢個人已經飛返去法蘭西。就等我地黎埋佢嗰份...


先黎有神出鬼沒，突然話要收錢的混醬...同埋正正經經的大合照!



之後上演一幕母子情深... 不過有仲咩精彩野令佢地大笑呢?



邊個咁大魔力令全場同時「眼定定」望住電視呢? (之唔係劉華囉! )



大家齊齊食壽包... 飲杯!

媽媽好

星期日就係母親節，蘇碧已經準備左靚靚禮物一份，佢仲話係「師奶界」名牌呀! (佢好野! 咁都知!)

當然唔少得同蘇太太加玲姐兩個長康孖寶搶先慶祝下! 今次仲有小健個女友欣欣同米高，連小巨人放工都由大埔趕去青衣，所以我地好齊人。

蘇太太happy，我地都happy!

雙皮奶時間

今日終於約到小影食晚飯，仲有小蒲，最主要係同小影小別己有幾個月。

晚飯之後我們仍然覺得未夠喉，要再戰甜品同傾過飽。大家就好似有無盡話題，上至小影萬二分期待的以色列之旅、小蒲的悠長假期，下至我公司的傻人傻事，我地幾個都滔滔不絕。最開心係小影話我知教會上次的賣物會成績不錯，下年我都要去為佢打打氣。

小影廿幾年都係十年如一日，永遠保持住開朗嘅笑聲同充滿童真嘅心境。有時候我都會因為佢無交帶而有點「惱」，不過一同佢講野，又會嬲唔落 (好氣又好笑 ^o^)。我們永遠無憂無慮的小朋友!

期待我們下一次的雙皮奶時間。

天天新煮意

近來同翠斯嘅話題，都會講到去煮野食上，原來佢近來對煮飯仔充滿興趣。前幾日同蔡太傾計，竟然又傾到同樣話題。睇黎真係要試下佢地嘅手勢，或者大家開個切磋大會都唔錯喎!

至於我家小菜，真係好似越煮越多。由開始時一餐兩味，依家已經進展到一餐四味... 遲啲咪要日日九大簋? 其實都係我心多多，又想試新野，又怕小巨人不對口味，所以煮多幾味「大包圍」。不過都要讚下小巨人，無論我煮咩都好，不論好味定難食，佢都照單全收。多謝晒!

是日晚餐
香茅豬排 (<-- 我無咁勁，係巨人媽媽的得意傑作)
蘑菇汁薯仔蚊雞
清蒸鯇魚腩
上湯鮮蝦滑浸娃娃菜

恐怖經歷

「威猛先生」的確係好威猛，只不過係做家務時唔記得戴手套，真係比佢連皮都「乸」甩埋。就連手上皮膚都抵受唔住佢嘅威力，要換皮咁樣，佢地好似擦膠碎一樣漸漸脫落。真係好恐怖。

做家務時，真係要戴番對手套，好好保護先得。唔係真係搽幾多潤手霜都無用。

Tips for Daily Care

‧時刻保持手部皮膚乾爽，但要定時滋潤。洗手後一定要抹乾水分並立即塗上潤手霜，因為水分在皮膚上蒸發，會連帶皮膚本身的水分亦同時抽走，令雙手加倍乾燥。

‧做完家務後，可用檸檬汁或醋加水洗手，能去除殘留在皮膚的清潔劑鹼性物質。

‧積厚的甲邊死皮的確難看，但太常修剪會令甲邊變得脆弱，易受感染發炎。

‧手肘及手指關節色素特別深，可用敷完的面部美白 paper mask 的精華素塗於手上，既不浪費，亦可美白雙手。

‧就算在冬天也千萬別忘記為雙手塗上防曬霜，因手部的黑色素細胞比面部還要多，容易出現皺紋、色斑等光老化現象。

心郁郁

晴晴:「咪睇我個樣斯斯文文，其實我有一個不可告人嘅秘密，就係我身材仲very good! 真係連米芝蓮都比下去架... 呵呵呵!」

好掛住晴晴呀! 所以今日仲玩即慶，約埋利是去同探夏太同晴晴。我諗bb一定好開心，除左唔捨得瞓要眼仔碌碌望住我地之外，仲要出動佢嘅「笑咪咪」眼，要電暈晒在場人士為止。

「三個女人一個虛」真係無錯架! 我地真係傾到唔捨得走。最後走嘅時候，利是都話心郁郁好想做媽媽。真係要支持佢同錢生，要快啲為$baby努力呀!

熊熊聖火

每次晌蘇太太屋企一有關於聖火嘅新聞，我就會自己高歌:「熊熊聖火... 」(真係好白痴!) 不過唔經唔覺，聖火真係黎到香港啦! 真係好想睇屬於我地香港嘅火炬接力，可惜要返工。

晌電視重播見到一片紅海，好多人都著住紅色衫打氣，真係好興奮! 最想睇都係劉華的一棒...

老家

今日係勞動節假期，我地又好耐未見過巨人爸爸同巨人媽媽，所以我就捉左小巨人返屋企。唔知點解... 反而係我捉佢返老家呢?

返到老家，小巨人當然受到皇帝式享受。因為巨人媽媽一早已經準備左西餐款待佢，仲有小巨人晌屋企永遠唔會有得食嘅榴槤... (諗起都嘔 :p)

我地好幸福，因為巨人爸爸同巨人媽媽對我地好好，又比我地好大自由度。每次我地返到小巨人老家，體貼的巨人媽媽都會準備好多食物比我地攞返屋企，真係又食又拎。黎緊呢幾日都唔駛煮飯啦!