迷失東京 (3)

淺草->上野->秋葉原

依幾日，東京o既天氣一係好悶熱，一係就落著大雨，我地成日都全身濕晒，唔係汗，就係雨...

今日好熱呀! 我同小巨人去左淺草，黎到東京，點都要同大燈籠影下相，不過我都係鐘意清水寺多一d。因為太熱關係，我地又極速登上地下鐵閃人了。




原本只係順路去上野搵下贊助人蘇碧特別要求shopping list，即係去搵米高的心頭好電單車用品，最後係我同小巨人晌大街上乾煎... (老實講，我當時真係有D怕會中暑呀!) 我地任務失敗了，不過仲搵到其他野。累到死之下，小巨人終於搵到佢心儀的「餐蛋飯」做午餐。休息夠之後，我地又向秋葉原出發啦!

未出發來日本之前，小巨人已經想去秋葉原啦! 因為依度係日本鴨記呀嘛，果然小巨人好開心晌度比較，不過當然係香港贏晒。我地晌秋葉原收獲係「小悟空figure」，特價200 yen。

迷失東京 (2)

海濱幕張->台場

自由行的好處係可以自己調節行程，當小巨人唔願起身o既時候，我就深深體會到呢個好處。




我地去到目的地已經係午飯時間，先黎一個地道吉列豬排定食，勁新鮮。



海濱幕張話就話係一個outlet, 不過真係似一個shopping mall多一d。價錢、款式同種類跟上一次來日本的御殿場都差好遠呀! 不過我唔想成日都買野、買野、買野，所以揀左個最近市區的outlet。好彩，小巨人都可以搵到佢心頭好的air max 360，可以彈下彈下返香港。

之後去左台場，本來不俗o既天氣又突然落起大雨，我地只好晌眾多商場入面走來走去。不過好彩未晌滂沱大雨之前，我地都仲影到自由神像同彩虹橋。落大雨真係令人有點掃興。本來幾經辛苦同小巨人爭取到去「大江戶溫泉物語」，又因為落大雨而取消了。




一於食返餐勁的補返數! 我地去左食和牛，仲有勁鮮甜的長腳蟹，好好味呀!

迷失東京 (1)

香港機場->日本(新宿)

終於開始我同小巨人迷失東京之旅。



因為朝早08:10飛機關係，我地05:00就要出發。都好，亦令我地晌飛場上面好好訓。原本話要4個幾鐘的機程，3個多小時已經到啦! 可以話係意外驚喜。一落機就要搵n'ex，即係我地的機場快線，好彩都係easy job。




去到新宿落車先係一個難題，因為新宿站真係好大、好大，成個迷宮咁樣。又加上天氣非常悶熱，真係想暈底。幾經辛苦，終於去到傳聞中又平又難訂的Tokoyo Inn了。又果然係房仔細細，勝在咩野都有。




是日夜晚去左新宿閒逛，小巨人去到Tokyu-Hands好開心，我都未見過佢買野好似個細路仔咁happy... 哈哈哈! 不過返酒店之前落住滂沱大雨，超勁，我地全身濕晒呀!


(我地個日式咖喱晚餐。)

極品男No.1

今日收到好消息，曾經被封為我地o既「極品男No.1」的健次郎要結婚啦!

其實我結完婚之後就好想去飲，去替人家高興下(糖糖的一次晌下午唔計)。依家等左10個月，好開心呀。

我明白時間一耐，好多朋友都未必可以成日見面，不過我仲係好開心有呢一班朋友。所以知道呢個消息，真係替健次郎高興之餘，終於可以又同一班朋友仔聚下啦! YEAH!

生日小聚

其實今日呢個聚會，係因為利是的生日小聚。不過佢依排心情唔好又「悶悶不樂」，就等晴晴「呵」番利是姨姨啦! 同場仲有出奇媽媽表演湊bb真功夫... 哈哈!

只係唔見晴晴兩星期，佢個樣竟然變左好多，仲出左隻牙仔... 佢見到我地好好心情又超happy，好少扭計。真係多得Summer Mama訓練有素，晴晴仲深明搶鏡之道，真係連媽咪都無情講，要將佢成個遮住了。

天使愛美麗

電影情節真係可以發生的...

話說英國有一戶人家門前個公仔比神秘人擄走左幾個月，原來係去左還遊世界。(全文紀錄by telegraph.co.uk)



原來世界真係有咁「美麗」的事。聽到呢個消息，唔知點解令人好心花怒放，整日心情都好起黎了。

嘻嘻嘻!

迷失東京 (前傳)

蘇碧終於貢獻左佢o個兩張雙人來回日本東京機票比我同小巨人了! (佢話早知係咁，佢就唔洗做咁大封人情囉... 哇哈哈!)

都係我地之前太「大安旨意」，原來BS都係會無位架，仲係整個9月，無論BS定Econ都已經爆滿! 只有聽過搭飛機比人upgrade，依家我地比人downgrade了。雖然錯過左搭BS的機會，不過都有免費機位，我地好好彩的了。

唔知今次我地會唔會「迷失東京」呢?

休息一天

打到黎啦... 打風呀!
正好可以休息一天。
我同小巨人要好好學習"do nothing"的藝術。

(今年真係打左好多次風呀!)

當晴晴遇上臻臻