晴晴與新玩具

玩具價值: 零蚊 (係蘇小弟個朋友的貨辦)
晴晴開心指數: 無價 (真係咩野都抵晒! 哈哈!)

簡單而隆重

今日係風和日麗同陽光普照o既日子，正好配合糖糖簡單而隆重o既婚禮。我都未試過下午去參加婚禮，地點係淺水灣酒店，仲係西式添呀!




餐廳環境同氣氛當然一流，真係好靚呀! 加上天氣好熱，我地一早入左餐廳嘆冷氣了! 哈哈!

諸事不宜

唔知依排做咩事，原來我地幾姊弟運氣都唔係太好!

先係我個電話出完trip返黎之後，佢就唔睬我啦(開極都唔著)，咁就報銷左。用住d舊電話先，就好似人間蒸發左，因為晌幾下就會無電架啦!

之後就係蘇小弟，佢部電話竟然睇唔開，投奔屎坑自殺了，佢仲有兩期先供完個電話。最黑仔係蘇碧，佢成日肚痛，入左醫院成個星期都未搵到原因。真係令人擔心...

衰運，唔該你快d遠離我地啦!!!

激氣

原來由溫州返黎已經有一個星期，每日都忙忙忙。加上pushy一句唔覺意話「我星期四有2個鐘break，要搵你傾傾。」我又要上深圳... 咁又無晒d時間。

點知竟然係兩車人去，得我一個人返(有鬼?!?)。按公司的規定，一個人返要自己攪掂。以前就話有船，依家只係話掉底你晌機場就算(唔通叫我搭飛機返香港?)。 最後求助同事幫我叫車，講好左話走高速公路，點知最後又比個司機帶左行小路，沿途同佢講，佢又當聽唔到，真係嚇死兼激氣。

其實我次次去大陸其他地方都好好，唔知點解係深圳先令我印象咁差勁... 加埋公司咁樣，真係令我好討厭上深圳! 唉...

香港人在溫州(4)

今日天氣好好 ，見到藍天白雲，仲有綠油油的田原，真係令對眼好舒服。



溫州有一個好出名的自然風景區，叫「雁蕩山」，我地今日就去左學下點去欣賞群山美景同秀麗山峰。第一個景點就係「大龍湫」，大自然真係好奇妙，我地一行四人去左呢個山巒之中，被咁多山峰環抱，感覺好「秀氣」。仲有水漾清澈的小潭，唔怪之得古人咁鍾愛對對佢地吟下詩。




另外就係最「雁蕩山」最受歡迎的景點，叫「靈峰」，要快d去吸收下靈氣先。原來阿小龍女都係晌依度拍架。





不過令我印象最深刻係下面的一個觀音洞。晌外面睇係唔會知佢晌邊度架，答案竟然係間廟建築晌一條石縫入面，仲已經係北宋年代咁耐。未見過真係唔相信，實在係一見難忘!



咁又過左四日，好快就可以返屋企啦! 好野!!!

香港人在溫州(3)

今日去左一個好農村的地方食午餐，沿路有好多田野，主要都係種水稻的。工廠老闆話呢一邊的地方未有工廠，而且四圍都有山，所以係好「原野」的地方。



食飯地點個農莊都好靚架，竟然仲有養山雞，原來山雞好靚架喎! 溫州地道的菜不錯架，都好似廣東菜，因為兩者都以清淡為主，有d唔知咩菜，不過好好味呀!




其實我去呢個地方叫樂清市，距離溫州有40分鐘，係一個中小型城市。市容都唔差架。工廠老闆仲介紹佢個由細玩到大的好朋友比我地識，我地仲傾左好多野。雖然只係萍水相逢，不過佢地(本地人)真係好友善、好熱情，感覺很好。

香港人在溫州(2)

今日好早就收工了，竟然仲可以返酒店先出去食飯。不過我發現左呢酒店的一大缺點，就係間房對住大馬路，而且係三樓，所以非常非常嘈!!!

唔知點解，呢度所有車都好鐘意晌住個喇叭，由朝早6點幾就一直響到夜晚，未停過。咁早收工唔怕悶... 因為早有準備睇下碟，同埋今日的收穫的「好書」一本。



酒店服務週到，好多野食呀! (廁所仲多「正野」)，全部係「有償使用」架!

香港人在溫州(1)

唔講唔覺，以前好怕坐飛機的我，依家竟然無咁怕啦! 今次去溫州唔駛2個鐘，所以好容易過。原來我仲同周杰倫同機，不過明星就見唔到了，只係聽到好多人叫同機場好大班fans呀!



其實返大陸出trip，可以睇到好多野。溫州人最出名做生意叻同勤力，所以真係要睇真d。今次特別係睇住個項目出世，雖然係低檔野，不過都好興奮。夜晚仲去左呢度海邊的大排檔，好好味呀! 我地仲同工廠老闆傾左好耐計，佢係本地人，所以介紹左好多溫州的事比我地知，好有趣。

今次仲分到間大房，好正... 呵呵呵!

好久不見

見到啦! 見到啦!

落左咁多日雨，今日終於見到藍天同白雲。好開心呀! 唔經唔覺，原來已經回歸11週年了。今日又係假期，天氣又咁好，真好feel!