碎碎唸...

工作上，又是一場政治角力。本來都相安無事，我部門突然又被人「盯」上，只希望可以儘快解決。又有很多煩碎的事待處理，忙得一頭煙。我已盡量叫自己不要發忟憎。不過很難!

回家後，小巨人又要我想一想照顧毛毛bb的問題。雖然可以交給蘇太太照顧，但現在又好像不是一個適合的地方。不過，有問題不是一同解決的嗎? 怎麼又要我一個人在想!

難怪毛毛bb不長肉...

別跑!

在外面的日子，遇著下雨天，真的很麻煩。

遇到繁忙時間，一時忘了，竟然心急的在追車，要人提醒:「別跑!」，才懂停下來。不過追到了車，竟然又遇到拒載，真激氣!

不過想起之前的情況，也廷危險的。我想，真的要戒戒心急的壞習慣。畢竟現在不只我一個人...

Week 25 - 狂食生活

依幾日開始，時時刻刻都不停口，由朝食到晚，唔比自己有肚餓既感覺。

以前諗，d人成日話我肥，如果有左就發達啦，可以大條道理食咩都得。點知依家，原來keep住不斷食野同食飽，係咁辛苦...

不過都好，我又開始煮返飯，因為要食新鮮同有營養既野。希望毛毛bb都鐘意食就好啦!

Week 24 - 爸媽學堂 (6)

唔經唔覺就去到最後一堂，今日講餵人奶。

我成日覺得呢件事好神聖架! 唔知我可唔可以做得到呢... 呢d「好野」，我當然想比毛毛bb。之前我已經搵左有關既資料，希望第時可以應付到。

趁有專業人事晌度，我地當然請教下毛毛bb依家過輕既問題。姑娘第一件事就問我工作壓力係咪好大，如果可以，就最好放低一下 。因為依家佢都知我會「全力催谷」，食d咩野已經唔重要。

依家諗... 可能同我平時緊張都有好關係，真係要放鬆下先得! 其實同姑娘傾計o個陣，我好想喊... 因為好擔心!

最後一堂既禮物:

Week 24 - 全力催谷

小巨人既「全力催谷」計劃，今日正式開始。

總知就係要監督我由朝食到晚，唔好比佢停! 佢親自做大廚之餘，仲有私房「蕃茄豆腐魚湯」。四餸一湯、白飯任裝。

好感動!

Week 24 - 奀仔

今日放工去張醫生度覆診，又可以見到毛毛bb啦! 但係「大件事」... 上次醫生話毛毛bb係細碼b，今次結果仲係偏瘦! 點算好?

上次排28% (100%入面1%-10%偏瘦，91%-100%偏肥)，今次毛毛bb「飊升」到9.9%... 所以已經晌起警號! 如果一直係咁，bb出世時, 可能只有5磅多、6磅左右，係一個奀仔。

醫生就叫我每餐食多d飯(要食足一碗)同飲多d奶! 但係廣華話我本身超重，唔可以太重。即係點好呀?

我地當然好擔心，我唯有努力食。小巨人已經定左「全力催谷」計劃，要我每日食多d、食多d、食多d!

Week 24 - 爸媽學堂 (5)

今日做左超級蛇王，可以晌屋企瞓返兩個鐘先返學，好精神!

到左照顧bb既topic啦! 我最怕都係幫bb沖涼，到時「的」佢唔起，浸親佢點算? 又或者唔夠快手，冷親佢咪慘...

我好想自己一手一腳照顧毛毛bb，雖然驚驚地，我都會儘力做架! 依家仲有幾個月，希望到時唔會唔記得晒。

嘩! 又有好多野拎返屋企:

探探劉小弟

劉小弟(Pluto細佬)出左世啦! 今日要返大陸，都要趕返香港歸隊探下劉氏一家。

當然仲有兩個準媽媽，何太同簡太，加埋劉太，又唔捨得走。我地三個預產期都差唔多，無見3星期，何太同簡太個肚已經好大，完全係準媽媽既樣，我簡直係相形見拙。

之前考慮緊無痛分娩既我，多得劉太既意見，真係要諗清楚。劉太仲比左好多生產要用既野我，又唔駛買啦!

毛哥

又係「6個八」聚會時間，今日積琪蓮有事忙，我地變左「5個八」。

閒談之中，除左更新各種公司內既gossip之外，仲多左bb資訊。柏師奶問bb改左名未，我就講左毛毛bb既故事出黎。咁可愛既名，佢地梗係笑到碌地。

豹豹話要改個型d既，話就叫「毛哥」啦! 仲可以改名做「陳豪」，英文名「Moses」... 真係fit晒!

趁機會同他他、柏師奶黎個下半場。下個月大計，一於要攪個浮誇生日會。主題都諗好啦... 「最緊要威」!

Week 23 - 爸媽學堂 (4)

又夠鐘返學啦! 我同小巨人好enjoy每次返學既時間。

今日主題係產後護理，原來都有好多事要留意。姑娘好有經驗，可以解答左好多疑問。有d野我都有諗過，終於有人解釋到。

之後又有有關臍帶血既講解，當然係hard sell啦! 不過知道多樣野都無壞... 價錢好貴，儲到小朋友18歲既時候，要5萬多!

今日返學既禮物:

偷懶

每一次都要等...
又晌地鐵月台罰企了。

不過好彩，最後工作提早完成，
又有一次偷懶的籍口。

Week 23 - 爸媽學堂 (3)

今日上堂講生產過程，真係觸目驚心... 血淋淋... errrr!

其實唔好話聽醫生講，我連平時晌書上面既相，都唔係好敢睇架，所以今日都係正式第一次了解到成個過程。我真係一邊睇，一邊有d反胃。 (醫生... 真係唔係普通人可以做架!)

不過小巨人安慰我，佢話唔駛驚，反正我都睇唔到架啦! 如果佢到時頂唔住，我都明白既!

今日又有好多禮物:

懺悔

其實唔關人事，我忟自己咁唔識諗。

都係自己衰格，最後忍唔住發皮四，有人好慘硬食左。明明遮左半邊面，咁都比人發現黑面... 好醜怪呀! 不過叫左唔好問，又係都要問。

最後攪到有人比人話，令我好唔好意思，真係要懺悔。

我好想say sorry的...

Week 23 - 爸媽學堂 (2)

又返學啦!

我覺得今堂好好玩，因為係運動班。有物理治療師講解同教我地做產前產後既運動。最緊要，係老師有教抽筋既時候可以點做。(依家一個星期都抽一兩次，估唔到我好抽得下... 勁痛!)

又有平時都可以既動作，其實d動作都好似瑜伽架! 我都唔可以偷懶，希望每日可以做到一至兩次!

今日返學既禮物:

Week 23 - 醫院檢查 (2)

到左23週，又到去醫院覆診既日子。

預約時間係11點左右，所以比之前一次更加多人，簡直人山人海。今次去見醫生，都係檢查個肚圍大小同聽上次驗血同飲糖水既報告，結果係一切正常。

但係醫生叮囑我，因為本身超重，所以都要注意飲食。到依個階段，只重左2kg，咁即係好定唔好呢? 希望之前儲定既糧，可以夠毛毛bb用啦!

見醫生唔夠十分鐘，就走得啦! 五個星期後見...

樣樣齊!

其實今日仲係小巨人生日，今年真係咩野都有:

有生日蛋糕s:

 

又有豐富既生日晚餐:

 

仲有溫馨既生日call:

更加有特備節目(爸媽學堂)同禮物(大攬枕)，今個生日，小巨人應該好開心。生日快樂，哈哈!

Week 22 - 爸媽學堂 (1)

今日我同小巨人一齊返學，一於「爸爸媽媽上學去」，我地報左名去醫院聽講座。

今日主題係整個懷孕過程。有d事可能已經知道少少，但係經過專家指導同解釋，真係唔同晒。我地仲去左參觀產房，原來生產既地方好似一個普通病房，唔係手術室咁冷冰冰。

姑娘仲同我地講，bb晌媽媽個肚入面咁多個月，成日只有佢一個，真係好寂寞，所以爸爸媽媽要多d同佢傾計。原來佢地最鐘意爸爸既聲音，小巨人要練定幾首飲歌啦!

今日返學，老師(姑娘)派既禮物:

Week 22 - 真人示範

今年好友們送比小巨人既生日禮物，就係U形大攬枕一個。價錢絕對唔平，都係多得一班好友既心意!

爸爸可以用、媽媽可以用、BB都可以用! 就即刻黎個真人示範。



玩玩下，真係舒服到瞓著左...

快樂生辰

小巨人的生日飯，好友們積極參與，我知道佢好開心! 我地一家又食又拎... 真係多謝晒!

等緊好友們既好消息，希望毛毛bb快d有朋友仔同佢一齊玩!

Week 22 - 牛仔褲

今個星期係22週，好友們都叫我食多d野，因為個肚仍然唔係好大。或者同我身型有關係吧! 即係本身已經肥，所以大左肚都唔覺。

不過令人最驚訝係... 我竟然仲可以著牛仔褲。因為之前真係好肥，毛毛bb出現之前又瘦左好多，所以依家都仲有位! 哈哈!

剪頭髮

趁住假期最後一日，去左剪頭髮! 好似越來越短，不過我都幾鐘意，好耐都未試過咁爽!

最開心都係返到屋企，小巨人已經準備緊晚飯。依家佢先係大廚!

不過，開心假期又要完了...

七小福

多得劉生記錯日子，劉太可以趕得切生小小劉生之前一日，參加我地既聚會。

今年四個小虎bb一齊出世，真係難得。即係4個準媽媽，4個準爸爸，同3個bb (柏亮、朣朣同康康，話咁快就做大哥同家姐了)。真係可惜太高興，又唔記得影一次大合照。

諗起以前，個個都係玩精，打牌、唱k、bbq... 全部都係玩! 不過我地既聚會，好快就會變成bb樂園。

期待今年聖誕節，可以集合七小福。

Love Mi

放長假的第一天，我們將原本要外出的節目通通取消，樂得在家做大懶... 特備節目是「Love Mi」演唱會dvd!

記得對上一次Sammi的演唱會，我將dvd放了一半已經放棄。因為主角明顯不在狀態，自今幾年也沒開封。不過今次竟然令人另眼相看，好像有種光芒在表演者身上。雖然是同一個人，但總覺得她比從前漂亮多了。

每當她唱著不同年代的歌，不同時間「想當年」的事竟然又出來，很懷念。我們就是這樣長大的...

Good Show!!

大龍鳳

放長假期的前夕，心情應該很relax吧!

怎料公司突然上演了一場大龍鳳，兩婦破口大罵，各不相讓! 原因竟然是冷氣開關的小問題。我不幸目擊案發經過，還做了現場直播。

豹豹說做了這麼多年也沒有見過此等奇境，那我真的好好彩，之前幾年，常親眼目睹同事們在爭執。之前還可以找籍口迴避，現在的位置是困獸鬥。

毛毛bb又像嚇怕了，躲來躲去...