記得當時年紀小...

就黎放完暑假啦... (其實我都好耐無放過...)
就晌差唔多唔記得o個種滋味時,
今日小茄給我的一張舊相,
竟然係中一時的學校旅行!!!

找到我嗎?

蘇小弟生日會

今日係蘇小弟生日, 估唔到咁大個仔仲可以開生日會, 仲係成家人同佢慶祝!! 呢個party非常盛大, 因為我地一行十幾人, 去左蘇碧做野間酒店食自助餐!

其實之前無諗過咁多人的, 最後差d蘇老大同蘇太太反而無得去. 不過我話佢地知, 幾日前我偷聽到蘇小弟同佢個朋友仔講電話, 佢話:"我生日O個日唔得閒呀! 我一家人約左我去食buffet!" 所以我知道佢都好重視呢次生日派對! 因為其實蘇小弟咁大個都未同佢開過生日會的...

都話做最細o個個幸福, 我同蘇碧送左個ipod nano比佢, 因為我知佢想買好耐了! Happy Birthday!!

遊山玩水

今日終於一盡地主之誼, 帶左Cathy遊山玩水... 其實係帶佢返大陸睇廠only... 哈哈!

不過返到香港, 就call左他他出黎, 帶Cathy去shopping, 去我平時勁唔願意去o既廟街... 因為之前同小巨人去過, o個度勁多道友呀... 嚇到我"連走夾跑"咁拉住小巨人衝出黎!

但係今次雖然好熱, 不過又幾好玩喎! 可能我地今次用遊客o既眼光去shopping去睇, o個度簡直係佢地o既天堂... shopping mall對佢地無咩特色, 廟街原來可以令到佢地咁開心! 好彩有他他晌度一齊玩, 我地睇得開心, Cathy又買得happy! 之後仲去食糖水... 導遊任務成功!

原來我地一直以為平常到不得了o既事, 去用另一個角度去睇, 可以變得好特別!

打打打...

今日又係羽毛球時間, 聽日係小神童生日, 所以我地特別去左食日本野做晚餐...

我地四個(小神童, 他他, 公主&我)打足兩個鐘頭波! Yeah! 小神童今日好似標左童咁, 完全唔洗抖! 累到死的我同他他都暗暗為佢打氣... 加油呀!

今日仲竟然行左幾條街去搵個相架 (比Cathy留念o既禮物)! 原本想放棄o既時候又比我地搵到, 勁開心! 有時d野就係咁奇怪, 唔搵又成出現, 要搵又搵唔到, 諗住放棄又會撞得到... 仲有d意想不到o既驚喜添!

遠方的朋友

今日去同我地英國o既同事Cathy去食晚飯, 我同佢成日都email聯絡, 但係見面都還是第一次... 不過已經有好熟絡o既感覺. 人同人o既緣份都幾奇妙, 雖然晌唔同國家, 都可以做朋友!

我地仲有好大班girls! 食飯時我地好開心, 講下香港, 又講下英國 (一大班女人晌度吱吱喳喳...) 特別係好耐唔見o既喵喵, 我地當然唔會放過佢, 食完飯之後就去"把酒談歡"...

Happy Night!!

Long Time No See

等左成個月, 終於都等到今日去睇軟硬演唱會... 總知整日心情特別興奮! 我地一行五人(小健, 蘇碧, 蘇小弟, 我&小巨人), 好開心! 不過要等蘇碧同蘇小弟, 慢麼麼, 所以要一早去到o既小巨人呆等! 晚飯都只係三扒兩勃, 務求最快去到紅館為止, 因為我地心情實在太開心!

去到會場人山人海, 賣精品o既人龍插針到唔入, 雖然只係離遠觀賞, 已經靚到令人心郁郁 (可惜太貴了...) 入到場當然更加興奮, 全場氣氛非常高漲, 就好似等住見到老朋友一樣... 見到軟硬一唱一和, 真係好似以前睇佢地咁. 講野故然好笑, 唱到大家都識o既歌時就仲happy!! (Gala Gala HAPPY!!!) 個個都好似返去自己少年時代, 唱唱跳跳! 返老還童呀!

仲有Eason呀!!! 我好鐘意佢架, 佢今晚唱得好好. 可惜可能同軟硬唔同時代, 感覺無咩火花! 不過我仲記得"麥當奴薯條... 條條條..." (夕陽無限好... 好好好...) 哈哈!

完場之後, 好多人都唔捨得走, 勁玩個面具同影相. 好耐都未見過呢個情境... 個個好似大細路一樣! 我勁鐘意我地四個呢張相... 好低b呀! 哈哈哈!