悶悶的

這幾天天氣很古怪，潮濕又不是很潮濕、有太陽又不是真正有太陽、熱又不是很熱、凍又不是很凍，但就是令人很不爽，悶悶的...

可能天氣古怪得連我也古怪起來，整個星期，每朝都不願起床，今朝更是非常頭痛，直至現在。可能又作病了... 「懶人病」又發作。

好媽媽

今日同豹豹加埋小神童去探剛剛生左bb既珠珠同事，小寶寶都未滿月，但係就有好多頭髮，又黑又多又貼，好可愛呀! 最開心係今日有壽司做晚餐，好味道! 同埋係我第一次去apm... (好鄉下!)

我知道，管教小朋友真係一個好大既責任。有時一諗起呢個問題都唔敢再想落去... 因為我怕教得唔好，帶左佢黎呢個世界，其實對佢都好唔公平。「你無教好我，做咩帶我黎依個世界?」原來父母對子女幾有期望都假，最實際係小朋友聽教聽話! 唔知點解，突然明白左依個道理。

我都知道將來既事無人會知，諗太多都未必有用。好佩服蘇太太，佢讀書唔多，但係就好識教我地，至少我地都無做壞人壞事... 哈哈。我都要裝備好自己至得!!

BB派對

原來我今個星期做左咁多野同見左咁多人。

菜太約左翠詩同果媽聚下，所以我呢個路人甲乙丙又出場了。最開心係終於見到果果真人，佢真係好靚仔呀!

菜太話自從生左臻臻之後，同其他媽媽級多左好多話題，特別係一班舊同學們，所以會相約出黎見下大家個寶貝。原來佢地三個仲係小學同學，又一次証明青衣的神奇力量。最好笑係靜B同果果，已經比媽媽們認定大家係襯家，翠詩同果媽既媽咪(婆婆)仲分別上左黎，見下孫新抱、孫女婿 (太誇張了吧...!) 兩B仲著埋情侶裝出黎，好SWEET呀!

臻臻依家拍埋佢地度，好似大個左好多咁。

小學同學會

我同小學同學們又見面啦! 成班人唔使warm up就可以嘈一晚，好好笑!

真係好，因為每次都有新成員加入，今次特別的有鄧生鄧太同黑仔。鄧生鄧太兩個都係小學同學，所以佢地一出場，各位同學仔都追問佢地戀愛史，鄧太亦同我地娓娓道來。小影講得o岩，佢地由細都大(小學、中學、大學到依家)都晌對方身邊，係緣份黎呀! 仲有黑仔，我對佢真係無印象了，不過講講下，原來佢係小巨人既鄰居，細個仲一齊玩。之前小巨人認出光頭仔係佢中學師弟，依家又有鄰居黑仔。

有時覺得，係唔係青衣太細先會有依d事情發生... 真得意!(我識佢，佢又識佢，佢又係我邊個邊個!)

唔願走

同小蒲、珍妮、菜生一家三口來一個飯聚。點解好似好耐無見臻臻咁既? 因為依家佢已經識得喪跑，真係捉都捉唔住呀! (呢兩日情緒又有d波動，後來終於發現「真兇」，好快又無事啦!)

小蒲竟然帶左我地7年前一齊去旅行既相比我地，席上各人都「v哇鬼叫」，因為o個陣當然青春無敵，依家就已經唔同晒。講講下，我地都想一齊去多次旅行，又台灣又泰國，講到好興奮，唔知最後攪唔攪得成呢?

我地之後仲去食滿記糖水，楊枝金露豆腐花... 楊枝金露將豆腐花味道全部蓋過了，有點失望。其實只係我地食完飯搵個地方坐下傾下，因為五大一細完全唔願走，哈!

小事一椿

其實只係一件小事...

明明係我好唔想做o既，偏偏又要應承。
明明我好憎人做o既事，偏偏又好想做。
明明可以任何事都唔理，偏偏又要介意。

點解有人可以憑自己感覺，我唔可以?
點解有人唔需要理其他人，我唔可以?
點解其他人可以對人有要求，我唔可以?
點解其實依家好想發癲，我唔可以?

人係咪咁矛盾的? (燥底中...)

日日都係情人節

今個情人節，小巨人忽發奇想話要黎一個溫馨晚餐，仲已經諗好左要買既野... 點知採購工作最後都交左比左助手(=我)處理。好彩返工附近有幾間專賣靚扒既地方，唔使走來走去，我地就有好野食啦! 我最後買左肉眼、西冷同牛仔骨。

本來屬於我地既溫馨晚餐，我諗住要SET好晒張檯整整齊齊架麻。點知向來不重包裝既小巨人話唔重要，都係「食」重要D，所以日日陪住我地食飯既報紙又出場啦... (比佢激死。)




小巨人竟然準備左個蛋糕，佢點知今日真係好想食?? 對我黎講，真係好surprise架... 好開心! 不過，最緊要日日都係情人節!

囍訊

小桃同學琴日通知左佢既囍訊。

雖然我地一班同學仔唔係成日見面，不過我成日都希望佢地呢班快d搵到好男仔/好女仔拉埋。 每當知道朋友們搵到另一半，我都感覺好興奮架(真攪笑)!

點知今日返到公司，發現左可能要出差，好彩應該可以晌小桃婚禮之前返到香港。不過就算撞期，我都會儘力爭取!

我真係好鐘意去飲... 哈哈哈!

我們

十幾年來，也沒有特別與你於生日當天慶祝。

我們只是一家人去吃一餐晚飯，
我也沒來得切去準備禮物，
這可能是你過去以來，
過得最平淡的生日節目。

不過我知道、你知道、他們也知道，
我們永遠在你身邊。

「生日快樂!」

牛年牛記牛一

唔知點解次次有依d日子，都撞o岩我要上大陸。約左7點，最後我8點才可出現。仲要成家等我一個，真係唔係幾好...

平時有我晌度就好多野講，不過今日真係攰到出唔到聲。只可以對牛記既牛年牛一講句:「你今日好靚仔呀! 公公，生日快樂!」

巨人廚房

唔知點解，近來做所有事都提唔起勁，就好似無左電一樣。連平時要做的事一概唔想做，也有兩個星期無下廚煮飯了。總知就係咩野都唔想做、唔想理!

難得小巨人毫無怨言，放工仲去買野煮飯比我食。仲連我午餐既份量都準備好了，唔通佢想我晌眾人面前「show off」?

我覺得好好味呀! 多謝!

又一團拜

朝早約左一班舊同事飲茶，趁過年團拜。覃妹妹轉眼已經4歲啦，依家識行識走識大叫又識扮怕醜，都係覃生攪笑d，成日用大人的語氣同個女講野。

雖然好耐無見面，同依班傻佬一齊，大家話題都離不開互揭蒼疤，例如問人股票蝕左幾多同埋做左負資產未(呆)... 點知在場各人不但無尷尬，仲盡數依家有幾慘，真係好好笑。我記得做野最開心既時候，就係同呢班傻人一齊拍住上，我都係傻架麻，記得當時吵吵鬧鬧、嘻嘻哈哈又一日，用最少人力又做最多野。

甜甜笑

上午晌大陸開左個無聊會議，坐左半日，講來講去又係同一樣野。唉! 都唔知仲要開幾多次，又要走來走去，真係好攰。好彩夜晚仲有個開心聚會，可以去出奇媽媽屋企團拜。

從大陸回來的鬱悶心情，見到希文之後竟然一掃而空。因為見到佢開朗甜美既笑容，也感染到我都開心起黎。

利是媽媽個肚越來越大，更有點手腫腳腫，不過仍舊神彩飛揚。仲有一個月就見到錢bb了，好心急!

薩莉亞

近來屋企附近開了數家新餐廳，小巨人終於有時間同我去試試。原來係日式意大利餐廳，入面真係有日本人當服務員的，餐廳有一個好似神話才出現的名字叫「薩莉亞」。

我覺得裝修好似以前在澳洲讀書時的小小deli，令人覺得可以隨意一點。雖然餐廳人手好像不夠，食物水準又一般，不過皇牌焗飯好好味，所有食物價錢非常便宜，還有只要加$20的自助drink bar。

叫左咁多野，埋單只係百多元，好抵食。

晴晴開心日記

我係晴晴，人人都話我係開心baby，梗係啦! 爸爸同媽咪日日都咁鍚我。

今日仲happy，因為我著住Auntie利是比我的靚裙仔去左搵Auntie Fanny，佢比左封利是我呀，不過利是都唔好玩既!




我梗係鐘意龜龜玩具多d啦! 有得玩我就開心!








都唔知點解佢地依家見到媽咪幫我剪既新髮型就笑得咁開心。咁又係，我叫開心bb呀麻，人人見到我都開心架啦!

人人都話我依家似Monchichi!





其實我最開心都係同媽媽一齊，同埋含住口水肩「咬咬咬」，我就最enjoy，你睇我幾得戚!

惡作劇之吻

多得長假期，我終於可以做想做好耐的事，我想睇「惡作劇之吻」好耐了(原來已經係2005年的劇集啦)，點知要2009年才有機會睇到。

之前小蒲都已經推介過，真係幾好睇呀。主角們個個都好好睇，我好耐都無睇劇集時kakaka的笑出聲了。其實個故事都好簡單，不過唔知點解有成廿多集，真長!

煲碟真係要用好多精神，無得睇又心掛掛，所以都係有假期才可以做的事。好彩有玲姐呢個大供應商，我仲可以立即接住睇埋「惡作劇２吻」。

美妙的長假期今日就完了，真的不捨...

左麟右李2009

夜晚去左睇「左麟右李2009演唱會」。佢地的大隻佬造型，真係好似以前軟硬隻碟呀! 仲有番新左的紅館，真係幾靚噃。

其實入面有一part都幾無聊，明明係演唱會，但係又夾硬找來錢嘉樂一齊講d唔好笑的笑話。不過都有好的地方，我鐘意佢地為香港打氣的主題，真係「唔使驚」!!

唔使驚 你總要定
唔使驚 我幫你 度過險境
唔使要 通行證
心口一拍 孤注一擲 取西經
陀陀擰 就似未醉酲
即使有錢剩 不懂反應
條條fing 像退役老兵
周身無乜勁 缺乏熱誠
擒擒淥 就算係吔粥
窩蛋半生熟 魚蛋搏命篤
船頭直 就破浪破冰
餐餐有得食 繼續繁榮