安睡晚上

多得夏太既自家制元玉紅棗水，昨晚終於有一個安睡晚上，一訓覺到天光，很久也沒有這滋味。

與同夏太詳談一晚，真是feel so good。她記得當初我入這家公司時，我對前面的路覺得充滿挑戰性，又充滿希望。不是她提起... 我也竟然忘了當年的感覺。

回家後，發現小巨人買了蛋糕慶祝... 嘩! 魔鬼蛋糕呀! (yummy!!)


身邊的人對我這麼好，實在很滿足!

七年之癢

「原來」聽日係我同小巨人既紀念日，我地已經一齊七年了。就快踏入第八年... 諗返起過左去既日子，好似flash back咁樣，好快就過左。

小巨人成日照顧我，有時我都知太依賴佢幫我做決定，攪到我都覺得自己好白痴。我又知道自己依排好失常，但佢仍然晌我身邊支持我。其實兩個人既事唔駛講出黎比人知，不過我只係想多謝佢... (雖然佢成日唔「撐」我的白痴決定...)

我欠左佢好多野，特別我聲大大話一年出一次，點知「出版」左一年就停刊既紀念集... 我諗佢都有「七年之癢」掛，唔係點會成日叫我幫佢"R"背脊。

上學去

好耐都無去學習既衝動，因為工作關係，報左一個課程，足足三個月。

每個星期五都要返學，合格唔到公司無得claim返。個課程比我想像中深，因為好多醫學名詞。唔好話讀出聲，十個字有五個字都唔係好識。人地個個同學好似年青有為，即係所謂的青年才俊。我呢... 真係要努力啲先得啦!

都唔知係唔係攞苦黎辛，有壓力!

肓毛

好日唔返娘家，點知又有大單野。

一返到娘家，離遠見打開晒大門同鐵閘，已經覺得唔對路。 果然有個陌生人坐左晌度，最驚訝係台面有份合約。再望下間公司，係無線收費電視，咁90%肯定又有個「肓毛」比人呃左啦! 另外10%，係我同依位人兄講完野之後...

「我地幫你地大廈安裝左天線，公屋仲係優先，唔使錢架... (即係一個月幾錢?) mmmm... 每日$4.5之麻，(即係一個月幾錢?) 一個月百三蚊!」

講講下，我竟然表演「怒撕」合約 (其實我都唔知點解當時會咁做...)。佣金已到手，點知比我攪到佢咩野都無晒位人兄，當然立即黑面，仲話我毀壞佢公司財物。我又夠膽拉埋鐵閘叫佢唔好走，叫佢最好去報警，仲搶返佢手上已成兩半既合約再撕過。玩左一大輪，我都放左佢走。

十分鐘之後，隔離屋有警察上門，有另一位人兄要返差館，原來又係差唔多case。

蘇太太重申，已經無比身份証明文件位人兄。點知位人兄竟然話，唔該你幫我簽張紙，証明我黎過啦! 原來呃d肓毛，咁講野都得既...

不過點都好，今次當個教訓。

最精神

點解有d人...

返工就眼瞓，講起玩就精神，吹水就最叻...

呢個世界，好彩仲有msn...

一次過滿足晒三個願望。

麥當當生日會

琴日既好節目，除左林狗之外，仲有臻臻既麥當當生日會。好多小朋友，好熱鬧呀!






上次阿boo都仲好怕小bb，今次開始識得同靜b玩了，希望佢地大個左都可以做對好朋友啦!

Yes, I Do!

有得睇林狗，好野! 我地由頭笑到尾，哈哈哈，真係good show... 「係囉」!

不過今次個主題我都好鍾意，結婚... 係一生一世既承諾。唔開心既時候，都唔需要將一、兩件事放大，正能量真係好緊要。表演入面講起婚宴時既場面，都會令人會心微笑(大笑)!

阿葛又出場，真係好拍檔。不過全場大約只係兩個鐘左右，好似貶下眼就完左，開心時間真係過得好快呀!

O咀...

因為工作關係，近來要指導一位新入職同事，真係令我嘆為觀止。佢做其他野還ok的，點知今日...

1) 流程圖唔識睇
2) 叫佢用文字表達流程圖，佢勁話「想死」同「死得」
3) 我要同佢講:「呢度只係兩頁紙，成份有18頁你點面對?」
4) 叫佢開始改已有電腦檔o既計劃書，佢竟然晌張白紙度開始寫essay
5) 幫佢睇緊份傑作，佢又竟然用筆蓋玩台面上的釘書釘
6) 我要開口叫佢「專心d」
7) 突然用高八度自言自語
8) 之後又想草草了事，話比人打回頭先算

我感覺自己用緊老師既語氣同佢講野，如果佢係剛剛畢業，我都可以理解。真係好難想像佢已經晌外國幾年同已經「廿到忟」。

真係O晒咀! 攪笑...

糊塗

令人對我失望，連我自己也很失望。

仍未分清是一塌糊塗還是一時糊塗，好像明知是錯的都會去做的。常常問自己:「我在做什麼?」但仍未找到答案，看來真的要好好反省近來發生過的事。

好像迷路了... feel lost。

同甘共苦

最需要朋友時，最開心就係「梗有一個晌左近」。

琴晚同菲比吹完一輪水，今日就要立即見面。不枉我地當年同甘共苦，一個飯盒兩份食... (其實係佢出去做part time 餐廳既飯盒。)即係佢養埋我啦! 哈哈哈!

之後即興去飲野，見到朋友們，亂吹一輪，心情又舒暢起來。

豬仔黎啦!

近來j2重播IQ博士，偶然看了一集之後，竟然不停追看... 它的劇情竟然仍有能力令我同小巨人「哈哈大笑」。

小雲同小吉真係好重要，哈哈哈!

輕談淺唱不夜天

是近來發生的事令我太緊張嗎? 以前天塌下都可以照睡可也的我，近幾天竟然「失眠」了! 夜半三點鐘，醒了，之後就全完沒睡意，竟然不只一晚。

原來，失眠真的很磨人。

(是做得錯事太多嗎? 錯晒、錯晒、所有野都做錯晒...)

我會掛念妳

朋友在兩星期前走了。

收到這個消息後，心情久久未能平復。大家每次見面的片段，好像一下子要全部湧出來... 近幾個星期，令我反復在思想一些問題，心情忐忑，忽然什麼也提不起勁。不過，現在是時候收拾心情吧!

今天晚上就要送朋友的最後一程，我會掛念妳。

祝 一路好走。