新爸爸

年初六，團拜活動仍陸續有來，今日係我同小巨人的舊同事們。

何生何太仲特別帶朣朣黎同大家見面，無見bb個幾月，佢肥左好多，而且仲識做多左好多表情了，真係超可愛! 當然仲有挑皮亮仔來探我地，佢無時停的走遍全屋，又成日KaKaKa咁笑，真係好鐘意佢! 又有阿dee同新婚老婆仔... 原來我地依家有好多對都派利是了。




玩得慶起時，仲有特別來賓，就係前兩日做左爸爸的簡生。簡太同簡bb仍未出院，所以佢仍可以抽空黎玩玩。睇見佢就快瞇成一線的雙眼，就會知道佢有幾攰，不過依然感覺到佢做新任爸爸的喜悅。

我地整個團體人數也在膨脹起來了，幾年後一定更熱鬧呀!

諸事皆宜

年初一、二、三陪晒屋企人，真正團拜活動才開始，仲係一連三日，又可以玩，真係開心。先來一個標美會聚會。

今年我應該諸事皆宜，只係不宜賭博... 真慘，做左大輸家。都好，就等大家發下新年財。射下龍門竟然射左幾百蚊出黎，所以成班人全部進入瘋狂境界! 哈哈!

我仲同積奇蓮勁飲之前錢生幫我買的紅酒，好耐無飲咁多，好high呀!

好戲連場

放新年假，終於可以同小巨人狂睇戲，我地呢兩日真係睇左好多套。「保持通話」、「超級零零狗」、「街頭超人」、「奪標」、「証人」，好多呀!

之前好想睇的「街頭超人」就麻麻地，大片格局，但劇情有點胡鬧，失望。本來依家已經好少睇港產片，反而「保持通話」同「証人」兩套都唔錯，制作好認真，劇情都幾好睇。特別係「証人」，張家輝做得好，估唔到謝霆鋒也不錯，對佢真的有點另眼相看。

不過，我係唔會陪睇「恐懼鬥室」1-5，請死心吧!

牛叔行好運

大年初一，今朝一早已經出發去飲茶，我同小巨人有份派利是，竟然又有得收，真係very good!! 公公今日好型，係一身今期流行的格仔look，勁! 係噃，因為佢係「牛叔」，今年係主角!

新世紀廣場仲全場波兒賀新年，好靚呀!

團團圓圓

不知怎解，近來的脾氣臭得很，有時候自己也控制不了。這些糟事，只有蘇家上下和小巨人才明白，旁人以為我不慍不火，其實不然。

不過我知道，無論我做任何事，小巨人也會原諒我... 年三十晚，食住小巨人粉墨登場炮製的湯圓。覺得特別好味道!

好過行花市

小巨人公司食團年飯，所以我就返左蘇太太度。

哈哈... 竟然有好多禮物! 先有蘇小弟的backpack，我好鍾意呀! 再有蘇老大的愛心小盆栽，我想買好耐，但係搵極都無心水，蘇老大一出手，果然不同! 仲有蘇太太幫我準備的煲湯材料同玲姐的榚點。




原來返娘家一轉，真係好過行花市。

行花市

放假無無聊聊，所以約左小巨人陪我去維園行下花市。過得海，當然又要去食我倆的另類團年飯，今次去左据扒。小巨人好專心睇住餐牌，個為食樣又出賣左佢了! 嘩! 依間餐廳仲有火焰雪山，我地就點來試試，不過我覺得酒味勁左d。





今年的新年好fit夾住long weekend，所以今日已經好多人。真係比上年仲要多，完全唔駛自己行，因為後面會有人推住行又睇唔到，所以我地無收穫...

洗邋遢

正式假期的第一日，真係攰死人啦! 由中午一直執執執，竟然咁就用左9個鐘頭。飯廳、客廳、廚房、廁所、睡房、書房，逐一擊破... 依家雙手想提起都好難，好攰呀! 小巨人仲問我做咩執一日就可以執得晒，係唔係偷懶，真係比佢激死!

不過見到屋企依家咁乾淨，真係舒服晒。第時無野做，可以試下做家務助理... 哈哈哈!

打擊自信

晴晴依家大個左好多，已經唔係一個bb樣，小朋友真係大得好快呀! 依家晴晴仲識得行幾步，又表演飛撲去媽媽度，好好笑!

不過好怕見到陌生人，可能係好怕見到我... 佢見到我就喊到七彩，夏太仲話佢有反常表現，即係見少媽媽一眼都唔得，又唔肯訓覺，好扭計。唔通我真係嚇親佢? 超打擊自信... 嗚嗚!

(bb, 你幾時見到我先好似相入大笑呢? 哈哈!)

恭喜發財!

下個星期就到農曆新年啦!

小巨人同我都好期待快d到新年，可以同家人朋友開開心心去慶祝一下，同埋掃走晒d衰氣。所以佢上星期日已經急不及待封好晒利是，大掃除呢d野就留番比我... 不過我覺得最緊要係個個身體健康、人人有工開!

太好了，好快就可以放兩個星期假，超期待!

小病是福

我都攪唔清楚係冷病左還是食錯野，總知就係病了。

好耐都未試過要晌公司「臨陣退縮」，返左公司都要返屋企，又肚潟又頭暈又想嘔，好辛苦呀! 返到屋企食左藥就訓，訓醒又食藥，唔知點解越訓又越凍... 夜晚再等小巨人買野返屋企食，不過起身都無力。好彩夜晚十一點幾出左一身汗，又覺得好番d，不過又來肚潟了。原來我由中午開始迷迷糊糊大昏迷，已經訓左十幾個鐘。

天氣凍真係要著多件衫呀!

開倉大特賣

「隨便睇，慢慢揀呀!」
「黎啦! 唔買都睇下啦! 真係好鬼抵架!」
「小姐，呢個款仲有好多顏色架!」
「係呀! 因為反應好得滯，我地公司再特別加推多幾款出黎。」
「Sorry! 呢個顏色只係得番呢個咋!」
「恭喜你! 成為我地今日第一百個客人，有買一送一優惠呀!」

唔知點解阿姐忽發奇想，要我地琴日開始晌公司攪個「開倉大特賣」。以上對白係我同小神童看檔時，拍晒烏蠅之際的自問自答。晌全無部署同宣傳之下，當然係無咩人黎啦!

D錢唔會由天跌落黎架，咪咁天真啦... 唉!

美麗回憶

一月真係結婚好日子，我同小巨人三日之內參加左兩個婚禮，今次主角係阿dee。

阿dee致辭時，講左番說話，聽完真係好感動! 佢話好早已經決定要晌依家舉行婚禮的地點，同埋以太太鍾意的方式籌備婚禮，因為佢想送呢個美麗回憶比太太。我見佢地成個婚禮安排都好有心思，特別係新娘子親手畫的請帖同簽名冊，真係令人印象深刻!

雖然天氣有點凍，仍然無損婚禮甜蜜又溫馨的氣氛。我地成班舊同事好似係全場最開心最嘈的，成班有大有細都玩到唔捨得走。當然又約埋大家新年又嘈過!

聚一聚

我鍾意冬天，因為好似有好多一大班朋友圍埋一齊的理由... 「X'mas了，係時候開party!」、「好凍，不如打下邊爐!」、「今日天氣好，好想去bbq!」、「你地快d出黎派利是!」好似全部晌夏天都做唔到!

今日的節目就係去錢生錢太屋企打邊爐。多得神奇的出奇媽媽指揮若定，令我地一班嘩鬼又有好野食! 同埋要多得佢，成日發起活動叫我地一齊玩。今次好齊人，我好後悔咁早走，因為我返到屋企先醒起可以搭順風車出番黎，下次一定要玩盡d!

我地又知道健太太有d唔開心，可能係緊張就黎出世的健囡囡，其實令我地成班朋友都好擔心。不過健次郎不愧係我地的極品男no.1，佢好主動學習，好似一切都為照顧好健太太同健囡囡而努力，真係令人好感動! 好快無事的了，最緊要係成日見下我地，咁就可以用大笑聲趕走唔開心的情緒。




期待下一次見面的「新年團拜」!

兄弟! 打氣!

今日係小巨人好兄弟大衛娶老婆仔的好日子，所以小巨人特別緊張，原來佢緊張到前幾日訓唔著我都唔知添。

小巨人平時同大衛嘻嘻哈哈一個樣，到依家好兄弟大日子，佢就日日打比大衛有相有量，好鬼認真。如果我係大衛都不枉有依個好朋友，就算平時比小巨人責怪兩句又有咩野所謂... 哈哈!

想起大衛以前單身寡仔時，成日同我地兩公婆四圍去。依家見到佢娶到個好老婆，我真係好開心，感覺佢真係大個仔啦! 仲可以有機會比小巨人著得咁斯文靚仔(真係無幾可)，我又可以又有藉口買新衫。So good!

原始風味

今日「6個八」又出動了，適逢柏師奶生日大晒，天氣又突然轉冷，我地梗要打邊爐賀一賀佢。

今次豹豹帶左我地去一個神秘地方，走過神秘小巷之後，發現原來好熱鬧，咁就知道有好野啦！原來呢度出名用炭爐，可以打邊爐之外，仲可以玩埋燒烤! 因為有d大風關係，我地感受唔到中炭毒的迷糊feeling。不過大家已經大叫好玩，仲好想食燒魷魚。豹豹推介o既花甲同魔鬼魚，好美味呀!



(是日好味精選: 鴻福海鮮四季火鍋)

其實土瓜灣對我黎講真係幾神秘... 下次有機會要再黎搵好野食先得，原來大家返屋企都幾方便。