戰利品

今日本來同o靚仔出差去廣州，不過我地計算錯誤，令我地有半日空閒時間。我梗係唔放過呢個機會，去左廣州好出名嘅婚紗街走左一轉。食完個麥當當就去作戰啦:



啲野好平呀! 可惜我已經之前買得7788，唔係應該仲興奮同買得多。不過都有戰利品:

大大個「囍」字，只要RMB5.00一個。(我見到金都賣$18.00架!)


「囍」字帶，都係RMB5.00一個。


5R DIY相薄一本，RMB15.00一本。

仲有我見到好平嘅係:
鞋--RMB29.00-39.00/一對 (我以為我買左對$60.00已經好平! 唉!)
利是封--RMB40.00/50個 (金都價係$60/50個)
相薄--RMB128/大Size (係新天地嗰啲) <--- 回本之作
UV Coating - RMB80.00/好大卷 (新天地sell我行我$1,600.00做本大相薄，嗰卷可以做幾百本)

點解唔早啲比我上去呢...

五行欠打

今日好努力做道具組手足，要做好利是大日子所有道具，只係仲有一個星期時間咋。其中一份就係愛的宣言，呢份仲係出奇媽媽精心挑選比錢生架... 好好笑... 哈哈!

唔經唔覺做好大部份都已經六點幾，我仲要趁今日好日子去剪下頭髮。

原本諗住夜晚食自己，不過剪完頭髮海倫搵我去街街，我梗係飛奔出去啦! 結果去左佢同奇雲新居之餘，我仲「身痕」，真係五行欠打... 不過我諗以後都係唔敢啦! 因為「身痕」完之後又暈又想嘔，攞苦黎辛超低能。

另外，希望海倫快啲開心返啦! Cheers!

一個月

原來咁快又一個月... 真係話咁快就到。

咁好日子，咁啱又約左小巨人、夏太同Summer Baby，我地一行四人梗係去慶祝一番，開心時刻就梗係去小巨人「飛佛」嘅pizza hut啦! 估唔到有個哈佬喂餐，有渣打卡仲好抵呀! 比平時仲要抵食。

原來咁耐我都未同過Summer Baby影過相，我覺得夏太有左佢之後，就越黎越「容光煥發」。我諗Summer Baby一定係同媽咪咁識扮靚呢! 哈哈!




慶祝完之後，我同小巨人又要帶番啲餅去青衣老家，因為要準備聽日過大禮。希望順順利利就好了。

Rock!

Robbie and Take That... Oh my god!

龍與鳳

本相薄有啲問題，我同小巨人隔日就去新天地咁滯，就黎啲員工都認得我地... 真係激死! 攪完一輪之後，自然係去又一城嘆下「叻沙」補返數... 好美味呀!

食完飯之後，我地又要趕返去秘密基地樓下個商場攞餅，係去攞唐餅同龍鳳餅。依家啲唐餅好靚，係迷你裝同有個好精美嘅盒架。以前覺得唐餅唔想食，因為太大個，依家見到咁得意又想食。啲唐餅靚到連小巨人都想揀唐餅請同事們食呢!



我都係第一次見龍鳳餅咋，咁大個，點食呀? 近啲睇下先:

避無可避

我仲以為可以避過「金都」黑店，點知都係避無可避。都怪我之前唔做好功課... 呢啲舖頭都幾好野，真係唔預你返轉頭。不過好彩，最後都揀到蘇太太心水「閃爆」飲衫。一句講晒，比錢前後好似識得變臉咁。激氣!

不過今日都比左個機會我同蘇太太加蘇碧去食飯，我地好耐都未試過啦。食完飯佢地仲陪我去攞請帖，酒樓嗰面都幾快手，因為只係用左兩個多星期就攪掂啦! 雖然佢地唔係我第一選擇，不過望望下，又幾得意! 好多心心心心心.... 嘻嘻!

約會

今晚難得同小巨人去date一date...
sweet sweet! 呵呵!

不過今日腰骨好痛，晌天橋度行到一半真係唔想行啦!


(「水晶燈與小巨人」)

想做的事

豹豹之前話好多野想做，等我都寫下個list先。

我希望...
1) 返屋企食飯
2) 剪頭髮
3) 探婆婆
4) 睇牙醫
5) 瘦啲
6) 煲多啲湯
7) 飲多啲水
8) 幫小巨人點算好過大禮啲野
9) 打去金都追蘇太太件衫
10) 同小蒲去搵伴娘衫
11) 準備利是嘅愛的宣言
12) 追酒樓啲帖印好未
13) 追新天地相薄改好未
14) 快啲scan晒未有相底嘅結婚相
15) 威迫利誘小巨人快啲執好佢啲野
16) 唱定啲錢入利是
17) 去身體驗查
18) 晌公司唔好上咁多網
19) 勤力啲做野
20) 做運動

好似好忙咁呀!

姊妹大作戰

利是同錢生仲有唔夠兩個星期就要做錢氐伉儷，我地成班姊妹當然唔放過呢個一生人一次嘅好機會去玩盡錢生。

今日我地就舉行特別會議，難得黎太都出黎，姊妹們真係一呼百應，連夏太都要帶埋Summer Baby出黎趁熱鬧! 經過我地精挑細選各個難關，真係未到「錢黃聯婚」當日，我地已經先興奮。呵呵呵!

兄弟們，準備接招吧!

好鞋子

仲有一個星期就要過大禮，經過蘇太太十萬個電話同每次要求不同之下，我地就出發去辦妥呢件事。其實我明白蘇太太係唔好意思講佢想要啲咩，不過一次過講晒，真係好過每次講啲唔講啲啦!

由於之前我地幫蘇太太揀的兩套衫真係「閃」到爆，為免到時有咩比較，都係順便帶埋巨人媽媽去租套穩陣啲。其實巨人媽媽都已經話要換三套衫... 一諗起又好想(((暈)))! 雖然有啲頭暈，不過都希望佢地開開心心，所以我同小巨人都儘量滿足佢地。

出開去太子，立即嗱嗱淋去買埋對「小」紅鞋，我揀左modern款式，好型架。話佢「小」鞋子，因為好多人都想像唔到，我呢個身型只係著35號鞋。(所以細個咪成日仆倒囉... 因為支持唔到我個「偉大」身軀。) 不過都有個好處，成日都好容易買到特價鞋，嘻嘻!

同場加映，仲有特別訂造嘅閃閃令婚紗鞋。好鞋子們，我嘅好日子，靠晒你地啦!

生日會

今年蘇太太生日會，又晌蘇碧打出佢嘅人情牌之下，超快book左人地要訂好耐嘅buffet! (Open Rice 食評)

最欣賞嗰度好味印度薄餅之餘，對佢嘅Tiramisu真係愛不釋手... 所以減肥大計亦順延一天! 依家仲話有個poolside BBQ，幾時先可以試到呢?

MaMa Happy Birthday!!!

all about LOVE

今日心情不大好，不過仍然去左睇千嬅演唱會。

之前睇過一次，雖然係千嬅fans，但老實講，佢演出真係不太穩定，所以今次都係無咩期望。唔知係咪無希望，反而有驚喜。今次真係睇得出佢下左唔少功夫，真係好聽。

全場主題「all about love」係關於「情」之餘，加埋bouns同型男古仔咀咀，令全場氣氛高漲! 而且仲係由華星時代一口氣唱到依家A Music，估唔到竟然會出現「有發生過...」，真係喜出望外。

可能由於尾埸關係，encore時間特別長，全場high上加high! 正正正!

該怎麼辦?

是這麼容易嗎?
我真的受傷了...

那麼在面對對方的憤怒時，我們該怎麼辦呢？我們需要了解一點最重要的事情，對方此時往往不是需要我們的教導-[告訴他你該怎麼怎麼做……]，[如果你早聽我的……]，重點在於【看重他受傷的心】。這時同理心會是更好的選擇，站在對方的角色想一想，我們會發現【原來對方的需要只是那麼單純】。也許只是一個緊到喘不過氣的擁抱。請記住，千萬不要在這時表現出"不耐，生氣，嘲笑"的態度，這樣只會讓事情越來越糟罷了。

by: 吵個有營養的架

有得睇

真驚喜，比原定日子早左一日可以去新天地攞相，仲要係星期日，真好。

可惜一大一小相薄竟然有問題，因為其中一兩張相效果唔係太好... 即係又要等! 好彩，可以先攞其他野，咁都不至於無功而還。

啲相... 好靚呀! 靚到好似唔係我咁，攪到我自己都以為我真係咁瘦... 嘻嘻!

自作自受

晌中山同寶寶共處一室嘅時間，抵受唔到零食引誘，我自己一個人蒸發左一包「熱浪」...

結果，依家喉嚨痛! 我自己知自己事，我一喉嚨痛之後就「超病」! 仲要比各方好友咀咒「肥肥降」，真失敗... 唉!

中山之行

又要工幹去了，今次係兩日一夜中山「camp」。

中山比我感覺好好喔! 乾淨整齊之餘，本地人又好純樸，比深圳好得多呢!

最好笑係同寶寶搭船時，竟然巧遇舊同事黎先生，佢仲要坐我地隔離位，真係約埋都無咁啱。夜晚當然唔放過呢個機會出去聚一聚。

我地去左食中山嘅地道菜「石岐佬」，原來佢地最出名係乳鴿同菠蘿包，菠蘿包入面真係有菠蘿架! 哈哈!

我們結婚了

我倆謹定於二零零七年十二月九日(星期日)上午十一時十五分

在 尖沙咀香港文化中心行政大樓地庫上層(UB)婚姻註冊處舉行結婚典禮

是晚假座 西九龍海庭道十八號奧海城二期商場UG01利寶閣酒家敬備喜酌

五時恭候
八時入席
(九點有得食...)

甩牙夢

前兩個星期發夢甩牙，我一直都唔敢講，因為我知道有人話發夢甩牙係唔好... 有不祥嘅事會發生。就係咁，真係令我憂心左一排。

不過我又發現，夢境真係會比到啲啟示我。因為我... 我... 我牙痛呀! 係時候要去睇睇牙醫。

相比起「不祥之兆」，總算放低心頭大石。嘻嘻!

Meridian

又係一張買左好耐但還未開始嘅唱片--千嬅的Meridian，唔係有錢無定駛，而係由CD format轉MP3，之後又要入落ipod，對於我係要好長時間同好麻煩，呢一次用左2-3個星期咁耐。

我係千嬅「粉絲」呀! 十年前，由「狼來了」開始，到夏太友情借出「直覺」大碟，就比佢嘅歌聲吸引。佢唱歌唔係特別悅耳，但係就令人感動。仲有好欣賞佢嘅言行，無論問題有幾尖銳，佢都可以不慍不火、輕鬆帶過。「別人笑我太瘋癲，我笑他人看不穿。」

今次大碟保持一貫高水準，耐聽又舒服。好鐘意「陌路」... 真係好聽!

我怎可能離不開 捱到現在
人潮裡面學會等待
那次偶遇你的愛 你不愛 我肯愛
還有很多個對手相愛
縱使感情離不開 人已不在
如能瞑目後便看開
對我最大的感慨 你不愛 他會愛
可惜他也許 與我擦過于滄海

冧歌有情人

同小巨人講開電話，原來我地要揀歌做video啦!
之前都有唔少意見，不過都未有決定。
正印未搵到，不過揾到個二奶!
(我聽到會喊的，所以唔係第一選擇!)

Living life without you is more than I can bear
Hold me close forever,
I'll be there....
I'll be there for you

I will always love you, I will always stay true
There's no one who loves you like I do
This I promise...

真係冧死人...

唔再做好人

有時我會諗，我係咪唔應該做好人呢?

如果我唔係做好人，我唔會搵賭神幫同事帶野上去! 如果唔係咁，唔會比到機會佢，一句唔該都無就「塞」d野比我! 仲要事前一句說話都唔講(死Cheap友)!

仲要比個個人話我做咩唔say NO!! 因為佢只係話呢件野好重，叫我試下攞，搵左我笨之後先叫我攞返去公司! 所以好唔開心...

大家互相幫忙係好事，但係都唔好咁恰我啦! 如果佢之前同我講，我會叫佢早一個站落車，唔駛我行多二十分鐘呀 (小姐)! 唉... 頂住頂住!

做左好人，啲人唔會多謝或感激你，只係會覺得「理所當然」，同埋再一次揾人笨或者比人覺得「抵你死」! 好憎! >_<

繼續沉迷

今日返到屋企，立即沉迷去搵皇太子同太子妃... 因為我睇碟時，有幾集跳左! 仲有好多字幕都跳晒! 激死人!

唔睇好好地，一睇收唔到制呀! 因為原來我miss左最好睇嘅部份。真係比晒籍口我「重溫、重溫」... 呵呵! 我同夏太講起，原來佢又係好鐘意<<宮>>呢套劇，竟然睇左四次! 好勁呀!

成日覺得皇太子好似一個人... 今日終於有人解開個謎底啦，原來係Vanness呀!



我覺得真係好似呢!

時裝表演

琴日去左新天地揀衫，晌衫海中搏鬥左五個鐘頭之後，總算完成任務。最後揀左一件婚紗、兩件晚裝、同兩件男裝禮服。靚晒!

就讓有model高度但無model身型嘅小巨人先來一個fashion show...

小蝦米

同小蒲去左探新鮮出爐蔡媽媽同蘇蝦仔小臻臻，佢真係好似一粒蝦米咁細粒! 好可愛!





同場加映: 「小baby慘被遭質實錄」



(小臻臻，唔係我地攪喊你架，你大個左千祈唔好搵我同小蒲ee報仇! 其實係你肚餓，媽咪去左沖奶，我地又唔敢抱你，所以搵下其他辦法之麻... 嘻嘻!)

陪著我走

「新開始運動」最辛苦嘅時候，我將我嘅注意力放晌一套舊韓劇<<宮>>上面。

其實好想睇好耐，不過仍是懶得開始，剛剛依家有一個好籍口! 還記得我好似垂死病人灘晌梳化，之後雙眼好似發光要不停追看... 就咁渡過最辛苦嘅時候。

套劇，好睇、好睇! 皇子，靚仔、靚仔! 皇妃，靚女、靚女!

Lokamochi Mamiba

琴晚有機會欣賞今年嘅森美小儀歌劇團，今年劇目係Lokamochi Mamiba... 好威喎，做歌劇! 原來係「落街無錢買麵包」咁解。哈哈!

我覺得上年好睇啲，不過今年都好睇，有笑又有淚。但係特別嘉賓竟然係容小姐... 失望!