甜甜蜜蜜@西歐 (7)

Let's Go: [法國] 巴黎 (羅浮宮博物館 / 百貨公司) --> [英國] 倫敦

上午去左羅浮宮博物館，可以四圍同近距離睇下啲藝術品，我好鐘意呀! 因為太多人關係，只可以遠觀蒙羅麗紗，有少少失望。不過我地去左個金字塔影相，等我地吸下啲靈氣先!



行完羅浮宮，我地就出發去shopping啦! 真係可惜，只可以有幾個鐘晌巴黎「血併」。時間真係唔夠用... 轉個頭又搭Euro Star去倫敦了!

甜甜蜜蜜@西歐 (6)

Let's Go: [法國] 狄莊 --> [法國] 巴黎 (凱旋門 / 香謝麗舍大道 / 艾菲爾鐵塔 / 亞歷山大三世橋 / 聖母院 / 蒙馬特山 / 塞納河)

今日行程比之前的輕鬆，因為我地已經來到巴黎。先來一個city tour -- 艾菲爾鐵塔、凱旋門、聖母院，白教堂。之前也想過沒有什麼特別，因為我睇報紙，艾菲爾鐵塔竟然被遊客評為「最令人失望名勝」。不過唔睇唔知係寶... 其實好靚架。而我竟然被凱旋門吸引住，我好鐘意呀!



晚飯之後，仲有令我好難忘的夜遊塞納河，真係晌巴黎必去呀! (雖然好凍...) 我地仲去左一幢大廈睇巴黎夜境，wooooo...

甜甜蜜蜜@西歐 (5)

Let's Go: [瑞士] 琉森 (獅子紀念碑) --> [瑞士] 鐵力士雪山 --> [法國] 狄莊

天氣越來越凍了，因為我地向住歐洲的北面走。今日仲會去雪山，凍凍凍呀! 不過第一站，就係去睇一隻獅子。我睇書嘅時候都唔覺得有咩特別，因為我地夠有匯豐銀行對石獅子啦，仲係一對添呀! 不過一去到，真係「讚嘆」左出黎。因為真係好宏偉，同埋係好似架。呢個獅子紀念碑仲有個故仔架... 係爲左紀念晌法國大革命時期，誓死保護法王路易十六而犧牲嘅瑞士雇傭兵而雕刻的。(link)



欣賞完大獅子，我地就上鐵力士雪山了。呢個雪山有好多本地人黎滑雪，因為離琉森只有45分鐘車程。我地搭左三程吊車，終於都上到山頂。不過唔去滑雪，真係無咩好做! 好彩有好刺激嘅吊車同好靚嘅風景... 嘩! 好靚呀!



玩左半日，係時候向法國出發了。

甜甜蜜蜜@西歐 (4)

Let's Go: [意大利] 威尼斯 --> [意大利] 甘武湖 --> [瑞士] 琉森 (水塔橋 / 琉森湖 / 舊城購物區)

今日就離開意大利了，一路向瑞士出發。途中晌意大利邊境經過一個湖區，叫做Como，我地就順便停低食午飯了。據聞呢度係意大利人嘅渡假區，而且較近瑞士，所以感覺比較悠靜。仲有鴨仔同天鵝四處走，睇到我地好開心。



再過幾個鐘，終於到左琉森，瑞士其中一個城市。只係幾個鐘車程，但係感覺同意大利完全唔同。呢度我地可以自由逛街，感覺好安全。而且成個地區都好整潔，城市都好井然有序，令人覺得好舒服，好似晌童話入面。(我依家終於知道，點解個個人都咁講啦! 哈哈!)



今日，終於可以自由出動去shopping! 不過都係嗰句，啲野好貴呀!

甜甜蜜蜜@西歐 (3)

Let's Go: [意大利] 柏拉圖 --> [意大利] 佛羅倫斯 (米高安哲奴廣場) --> [意大利] 威尼斯 (聖馬可廣場 / 道濟斯宮 / 嘆息橋 / 聖馬可大教堂)

早上就出發去米高安哲奴廣場，其實廣場是位於一個山崗上，所以我同小巨人一眼就看到整個佛羅倫斯嘅全貌。雖然無香港的高棲大廈，但係就有一股文藝嘅氣息，呢度仲有一個仿大衛像，不過我仲未見到真身呀! 不過都好彩，我地到嘅時候尚早，全完無人同我地爭位，但係走嘅時候就開始多人啦!



下午就全程坐車，不過好彩每兩個半鐘都可以晌啲休息站行下。三個鐘之後，我地就去到威尼斯了。呢度四面環海，城上面小屋群好靚。最令我印象深刻就係「聖馬可廣場」，好精彩。威尼斯最出名就係叫貢多拉(Gondola)嘅小船，因為佢係呢度主要交通工具。



今日有一個特別的感覺... 跟小巨人手拖手的在威尼斯漫步四周，真浪漫喔!

甜甜蜜蜜@西歐 (2)

Let's go: [意大利] 羅馬 --> [梵蒂岡] (聖彼得大教堂) --> [意大利] 羅馬 (鬥獸場 / 君士坦丁凱旋門 / 威尼斯廣場 / 英雄紀念碑 / 許願泉) --> [意大利] 柏拉圖

經過晌羅馬休息一晚，朝早就出發去梵蒂岡。雖然呢個係世界上其中一個最細嘅國家，但係聖彼得大教堂嘅氣勢，實在震撼!



之後返出去羅馬，當然必去鬥獸場同小凱旋門，真係外型一流! 仲有許願泉，真係好靚呀! 唔係親眼睇到，都唔知真係咁吸引。不過其他景點(威尼斯廣場同英雄紀念碑)，我地鴨仔團就唔可以落車欣賞啦!



今日天氣唔係太穩定，仲不時落住毛毛雨。不過無損我地興奮心情!!

甜甜蜜蜜@西歐 (1)

Let's Go: 香港 --> [英國] 倫敦 --> [意大利] 羅馬

今年的聖誕節，整個都會在飛機上渡過了!

好彩我地過左一個瘋狂嘅平安夜，我諗終於可以晌飛機上面瞓餐飽。

Merry Christmas!!

瘋狂平安夜

好耐都未試過過一個咁瘋狂嘅平安夜... 大吃、大喝、大叫、大喊、大跳、大笑!

大吃 - 小巨人果然係天生party攪手，一個人可以將十幾人所有食物準備好! 咖哩雞飯都出埋，問你服未!
大喝 - 飲品份量超級充裕，最令各位嘉賓捧場竟然係小巨人自家制利賓納仔仔!
(「飲飲食食」... 可能係唯一唔洗擔心佢嘅野!!)
大叫 - 我地十幾人，竟然為左安廸老兄嘅一百大洋現金獎叫到聲嘶力竭。
大喊 - 好耐未聽過咁多人叫自己個名... 因為抽到名嗰個無份攞獎金!
大跳 - 十幾人一齊熱烈dup地，唔比人投訴才怪! 呵呵呵!
大笑 - 回想起個場面實在太失控同攪笑，竟然笑到無氣!




雖然今年大家興奮得忘形，連每年必影嘅大合照亦無人記起，不過今年實在太開心!

聖誕版BBQ

聖誕佳節，我同小巨人當然唔可以浪費，一於約定好友們食到夠、玩餐飽! 其實今次都係我地多謝一班兄弟姊妹嘅慶工宴(真係要多謝屋主添美借出安樂窩)。大家拖男帶女，估唔到竟然有18人... 所以場面非常熱鬧!

多得我地feating左聖誕baby小臻臻落力娛賓，因為無論佢瞓左、笑緊、飲奶定係換片片，大家都係咁開心! (哈哈哈!)最緊張當然係交換禮物時間，真係估唔到各位$30竟然可以買到咁多野... 故事書、毛巾、厠紙筒、相架、公仔杯、朱古力、蠟燭座、浴鹽! 簡直係份份驚喜，無盡興奮。

我地戰鬥力亦非常強勁，竟然由3點玩到11點。燒到無晒野食就去飛車買返去再戰鬥過! 因為夜晚先係我地嘅戲肉，我都係鐘意小健金句:「人生唔係有好多次機會有幾個選擇晌前面!」(哈哈哈!)

真係要多謝各位來賓，大家要開開心心過聖誕呀!

失而復得

好友告訴我，她和男友復合了。她就是沒計較他的過去，再給他一次機會。

她說其他的朋友也怪責她這麼輕易就樣他重投懷抱，至少也要給他一點教訓云云... 而我知道她的決定後，第一時間就恭喜她可以過一個甜甜蜜蜜的浪漫聖誕。

其實不是我支持她的決定，也不代表我覺得他沒有錯，不過至少她已經決定了，也不是旁人一兩句就會改變她的決定。愛情是肓目的... 也耳聾的!

她告訴了我他的事情，不是有很多人有回頭的機會。他真的很幸運，也希望他珍惜她!

甜甜蜜蜜@西歐 (前傳)

由細到大已經好想去英國，終於夢想成真。

雖然每當打開上面個蜘蛛網(Tube Map)就頭暈眼花，但係今次係自己第一次plan行程，終於可以想去邊、就去邊，真係有啲未去先興奮! London Eye、Arsenal、High Tea、Musical、shopping 我全部都要帶小巨人去玩下!

實在係多得小巨人投資我個「夢想成真基金」，我出少少力又何妨呢... 呵呵呵!

不要氣餒

原本今日好無心機，係因為工作上的不如意! 點解做黎做去都好似做唔好架?? 點都滿足唔到班老外大佬，都唔知佢地想點。所以真係好想將個title改成「好氣餒」...

同小巨人提起「不如我搵過份工，好唔好?」今日佢竟然語重心長咁同我講，其實去到邊度都係咁架啦! 我依家啲同事又好，上司又好，公司又唔係太差，咁其實仲想點呢? 諗轉工... 不如諗下點做好啲仲好啦!

突然間我好似如夢初醒，真係醒晒! 以前就有籍口話咩都遲啲先，依家唔可以再逃避啦! 我真係要努力啲，如果再唔得，起碼我都有盡力過! 我要發奮呀!

仲有第一次去左睇黃子華棟篤笑，真係笑死我! 好睇、好睇! 睇完又開心返啦... 呵呵呵!

小巨人爸爸

小巨人做爸爸啦! 不過唔係我同佢嘅愛情結晶品，而係愛「心」結晶品! 因為娜娜係小巨人晌宣明會助養嘅小朋友。

助養娜娜都係一場緣份... 話說錢太之前提起想助養小朋友，咁啱宣明會又有個聖誕節推廣計劃，可以寄個小朋友嘅資料黎比我，再由我搵助養者。我梗係「嘭嘭」聲叫佢地寄黎啦! 不過原來錢生錢太想幫番中國大陸啲小朋友，無問題，咁我又叫宣明會再搵另一個小朋友!

噢! 咁娜娜點算呢? 無人要佢... 好慘架喎! 我同小巨人提起呢件事，梗係叫佢考慮下啦! 佢真係考慮得好慎重，因為... 因為... 佢話怕唔識寫信比小朋友呀! (哇哈哈... 笑死我!) 我叫佢唔駛擔心，至多我寫信比小美美個陣教埋佢啦!

就係咁，小巨人就做左「小巨人爸爸」啦!

生日好快樂

多謝菜生菜太、珍妮、小蒲，當然仲有小巨人! 今日好開心呀!

又有新玩具

前幾日，小巨人已經為我準備左生日禮物。因為佢話我晌屋企無得上網好唔方便，所以「知道」我需要有一部自己嘅電腦。(嘩! 佢真係細心... 好感動。)我梗係好鐘意啦! 初時見到有粉紅色，不過唔可以加ram，最後揀左都好靚嘅白色。

跟據小巨人所描述:「呢部 Eee PC 好的式同埋好輕，我地可以帶埋佢去旅行用之餘，仲可以得閒load啲相同短片比公公睇添呀! 真係好方便架!」

點解呢份禮物點睇都似係小巨人件新玩具多啲呢? (不過我都好鐘意... 多謝!!!)

生日快樂

陳C9，生日快樂!

今日仲收到個好消息，我同小巨人終於可以晌英國留多幾日，仲要係我地原定計劃嘅三日行程，實在太好了。小巨人話係巨人姐姐幫我地搭通天地線「爭」個位返黎架，所以咁多團人只有我地一對可以stay behind，真係要買份大手信返黎多謝佢呀!

今個生日，我真係好快樂!

幸運是我

姊妹們:

多謝小蒲、多謝珍妮、多謝小花貓、多謝小影、多謝蔡太、多謝錢太、多謝黎太小小! (認識到你地，我真係超級幸運!)

全靠你地無條件付出同對我嘅愛護，我先至可以有一個咁令人回味同畢生難忘嘅婚禮。正因為妳地落力嘅表現，令我可以安心去做好新娘子呢個角式。我呢個「癲喪」新娘可以安心得由朝早笑到夜晚，可以安心得見到你地呢班buddy時立即唔顧儀態去興奮大叫，可以安心得去食午飯嗰陣帶頭飛奔落街。

仲有多謝你地嘅悉心打扮，見到你地個個都咁靚嘅時候，我真係想join埋你地做姊妹團一齊玩! 你地真係史上最強嘅姊妹們... I love you ALL!!!

超級幸運的Fanny上

大囍日子

一級班底...
十級興奮!!

還有一天

仲有一日，我就要做陳C9... 不過其他野都未黎得切諗，都係準備好聽日嘅大囍日子先再諗。

我同小巨人咩都反傳統，人地話結婚之前一日唔見面架麻，我地就偏要見。不過古人真係有古人嘅智慧架，因為我地由朝嗌咬嗌到晚! 我真係唔明... 點解明知唔夠時間都唔搵朋友幫手攞衫同買野呢? 點解要臨last呢日先去睇個rundown呢? 點解我比左佢成個月佢又唔落comment呢? 真係激到我無聲出...

忙左成日，好彩都趕得切晌吉時之前上頭!

扮靚靚

仲有兩日咋! 仲有兩日咋!

經過之前兩天大陸做勞改，今日開始終於可以全力出擊去準備大囍日子。首先當然係「喪瞓」... 到左夜晚就去左扮靚靚，約左海倫去整指甲。第一次整gel甲，有人話好痛架。不過我還好，無咩大問題。最後我無揀到新娘甲，因為好似太誇張了。我揀左閃粉加閃石... 唔係仲勁咩?? 好靚呀!

哎呀! 不過好唔方便，「R」唔到痕呀...

溫暖的家

仲有一星期就到大囍日子，我同小巨人每日都要定好目標、做好準備。

其中一個大project，就係督促小巨人將非法霸佔左晌大廳半年嘅雜物進行大遷移。因為巨人爸爸話秘密基地敬茶就可以，唔駛返巨人老家。(對小巨人黎講，真係大件事...要走鬼!)

經過幾個鐘頭指指點點，當呢個大project完成之後，我都不禁「嘩!」左一聲，真係從來(小巨人搬左入去都半年啦!)都未見過咁整齊嘅秘密基地! 不過呢個只係首部曲，我地仲要晌聖誕之前攪掂個尾部曲呀!

我一定要將秘密基地變身成為「溫暖的家」!

謝謝

同事A說不來了，因為要出門工幹、
同事B說不來了，因為一個星期後要考試、
朋友C說不來了，因為有其他婚宴的邀請...
(十二月真是結婚、考試的好季節，証明我們沒有選錯。)

被人拒絕的感覺絕對不好受，但我已學會用平常心去面對。當然，更要感激當晚出席的親朋好友。之前不會明白這一份「情意」，但經過這一次的經驗後，我更學懂珍惜。

謝謝!

小小大食會

自從朋友們各自成家之後，我地終於有地方聚一聚。因為以前同屋企人一齊住，只可以等屋企無人先可以「作反」，依家就唔同，今日就係「荃灣之友night」(即係Summer Mama、小蒲同我)啦!

Summer Mama親自下廚準備左意大利粉，小蒲就帶左好味甜品上去，我就當然負責食了。我個角式好重要，因為又要食又要拎，我地食唔晒啲野，梗係由我攞返去比小巨人消滅晒佢地。(勁!)