笑笑小時候

今日去左公公家聯誼聯誼，突然又即興睇下小時候嘅相，笑不停呀! 呵呵呵!

因為我地見到兩歲之後未瘦過嘅杰仔、細個肥肥白白嘅小健、成日比人話馬騮精托世嘅超級奀皮仔蘇小弟、冬姑頭的我、細個同大個都係一個樣嘅蘇碧，仲有仲有...

我地都好掛住嘅婆婆!

五週年

仍然記得那飛一般的感覺。
又似發夢，又飄飄地，好想立即飄向佢身邊!
(我咁大件都飄到? 嘻嘻!)

今日巨人料理特別炮製「五週年」特別扒!
支蠟燭去左邊度呢? 無喎?!?!
一切都唔緊要...



「有你就夠了!」

關心不關心　誰留神　哪個真心走近
哪個珍惜我　對我勇於攀山涉火

犧牲不犧牲　誰長情　哪個不捨不棄
我已心中有數　妳愛我不少於自己

或是我叫妳有點生氣　我忘掉感激妳
但願妳聽我這些真心說話一一說起

新開始

新生活的第一天...

整日缺氧中，
感覺有點迷糊，
幸好是放假天，
累了就第一時間跳上床!

想起小巨人的一番說話，
真的要好好反省反省。

I wish I knew how to QUIT you...

愛回家

今年係最後一個中秋節以大懶蟲嘅身份晌屋企食飯，即係咩都等蘇太太做，我就好似死蛇咁。雖然依家少返左屋企，但係「回家」感覺真係好。睇見蘇碧食完飯就走，就感覺到我下一年可能同佢都係一樣，實在有啲唔捨得。

多謝蘇老大! 今晚有人話贊助5.1喇叭濕濕碎!

多謝蘇太太! 今晚餐飯真係好好味!

多謝蘇碧! 今晚攰到傻左仲返屋企食飯!

多謝蘇小弟! 今晚又同我吵吵鬧鬧夾擊蘇太太!

豹豹話佢有好多野想做要寫低晒佢。我諗我第一樣要寫低嘅係... 要返多啲屋企食飯!!

◆◇╭╮◆◇◆◇◆╭╮◇◆╭╮
◆◇││◆◇◆◇◆││◇◆│└╮
◆╭┴┴─────┴┴╮～└─╯
◆│　　　　　　　　　│＼｜／
◆│　●　　　　　●　│─☆─
◆│○　╰┬┬┬╯　○│／｜＼
◆│　　　╰─╯　　　│◤ ◥
◆╰─┬○────┬○╯☆謝☆
◆◇╭│　　　　　│╮╯☆謝☆
◆◇╰┴─────┴╯╯◣ ◢

小小巨人

今日去小巨人屋企食飯，順便尋寶。

巨人媽媽隆而重之打開佢個藏寶箱，真係有大發現。巨人媽媽後生時好靚架，仲有外國人影子。唔怪知得小巨人成日都比人話似鬼佬。

仲有巨人媽媽大爆小巨人細個嘅秘密... 原來佢係「無胆瀨尿蝦」x「兜風耳奀皮仔」!

好可愛嘅瘦monkey! 哈哈!

執子之手

今日相約左利是去做家訪，又可以睇埋佢地台灣婚紗相「正身」。

我仲陪錢氐伉儷去左紅磡試介指，好靚呀! 對介指款式特別之外，仲係佢地「失而復得」，所以對佢地好有意義。之後去尖沙咀攞埋油畫，係超大size，加埋佢地兩個嘅「甜蜜大頭」，放晌酒樓一定超煞食。哈哈!

去到錢氐舒服安樂窩，加埋有佢地嘅婚紗相「坐慶」，全間屋就只有我把「嘩嘩」聲... 特別係啲相，靚靚靚，好羨慕呀!

一諗起我可以見証到佢地由好朋友到依家就黎去到人生另一頁，不其然又感動起黎。到佢地註冊一刻，真係怕我喊先過佢地... 點算呢?

神算子

近日同事們有新玩意。事緣係佢地晌公司見到本通勝，貪得意睇下。原來柏師奶晌加拿大苦練左一種絕學，就係「諸葛神算」。

佢地唔玩由自可，一玩就玩上癮。柏師奶同豹豹突然做左算命大師。我梗係要幫趁下啦!

籤詩：莫歎殘花，莫問枯樹，屋頭春意，喜笑嘻嘻。
解籤：此籤寓意，莫為過去失敗嘆息與埋怨，新機已到來，自然會帶來歡樂。

今日個個笑餐飽，文學修養指數仲突然標升左! 不過依家科技發達，原來唔洗查通勝查得咁辛苦啦! (諸葛神算)

肥boy

恭喜! 恭喜!
蔡生同蔡太愛情結晶品琴日終於出世啦!
肥boy呀! 有8磅重!
小臻臻眼仔碌碌，精靈又可愛。

晌蔡生個msn space度見到小臻臻，
立即忍唔住要將佢張靚仔「肉」照據為己有!

回歸之喜

(拍拍手) 今日慶祝小健回歸之喜! (再拍拍手)

大家開心嘅程度，係連公公今日啱啱出院都要立即去機場，急不及待要見吓個「乖孫」，仲成晚都笑咪咪。

一個人有五件行李總有原因啦! 為左慰勞我地呢班「小健後援會」會員，佢帶左好多野比我地。其實我之前都無特別order，一於就晌蘇碧度抽水啦! 即係本來佢有三對鞋、三個袋同三件褸，我每樣攞左一件之麻，唔係好多... 不過全部都係最靚嗰件咁啦! 呵呵!


(只係後援會各會員紀念品其中一部份... 勁!)

朝9晚6

千呼萬喚寶寶回歸了... 熱烈期待...
終於可以過返我朝9晚6嘅生活。
以前一向係公司遲到皇頭幾位嘅我，
竟然從未如此期待可以9點鐘返到公司。

我同好友們歡樂晚餐時間，返黎啦!
我嘅「濕平」時間，返黎啦!
我嘅煲湯時間，返黎啦!
我嘅午睡時間，返黎啦!

五福臨門

我好鐘意著褂，因為真係一生人得一次。

今日終於捉左蘇太太陪我去試褂。其實都揀左好耐，因為比較多紅色嘅小五福青春啲，又著得瘦啲，不過多啲金銀線嘅大五福(中間)就高貴同隆重啲。最後我都係捨棄左我嘅青春而投向高貴。

林狗話最hip pop係啲新娘呀嘛，所以我「大囍日子」一定要同套褂影返啲hip pop相。

Yo Yo Yo!

有你多好

有啲朋友，有佢地晌度會特別安心...

甜心一號
夏太除左唔做姊妹之外，我諗佢咩都陪我做晒。最記得有個試衫姐姐話:「你都係睇佢話好唔好之嘛!」哈哈! 蘇太太又話:「唔怪之得你揀呢度住，原來咁近夏太。(其實係純粹巧合)」<幕後黑手>呢個credit我一定要比佢呀!

甜心二號
利是就黎做少奶奶，我連大囍日子都要就佢同完成婚禮之後，因為一定唔可以錯過佢同錢生嘅婚禮。利是忙緊自己嘅婚事都仲要幫我諗埋其他野，真係超感動。原本怕佢一個人晌「大囍日子」會悶，點知佢一口話無問題... 有佢晌度，我真係放心一百倍呀!

甜心三號
今日回家途中同小花貓傾電話，佢好關心我同小巨人大囍日子嘅進度，仲比左啲意見我。雖然只係短短十幾分鐘，但係我已經有安心嘅感覺。雖然我地唔係成日見面，好彩我地都成日「浦」住大家個blog，所以又好似晌大家身邊一樣。

有佢地晌身邊，我真幸運!

試妝(二)

「嘩! 好靚呀!」係我見到呢次個妝嘅感覺! 其實我心入面仲有「高下立見」嘅感覺...

今次呢個化妝師幫我解決左大細眼同雀斑勁嘅問題。雖然我地去到佢鋪頭已經差唔多9點，但係佢都無因為趕收工而馬馬虎虎，仲有好有心機慢慢黎。攪左幾個鐘添呀!

所以完左試妝之後，我地就confirm左! 好野，又攪掂!

婚姻大事

今日節目多蘿蘿，全部都係關於我地「大囍日子」。

一朝早就要去到尖沙咀揀時間，一如我地所估計，全部人都係揀晒大hall。我地個籌較後，所以係一個選擇都無，只係剩返朝早11:15，我當時個腦真係咩都諗唔到。其實我地可以揀細hall，不過真係差少少。小巨人計過都夠時間，所以「決定啦! 最後答案11:15am!」

本來想去一個新地點睇下有無其他選擇，點知途經SOGO，我地真係忍唔住... 去左shopping! 買左好多野呀! 時間啱啱好，仲可以去搵夏太食個lunch。就係咁，去second choice睇場嘅事完全「淡忘」左啦! 哈哈! 夏太都話星期六個化妝師唔係太好，聽日仲可以陪我去試另外一個。勁開心... 唔知點解，有佢晌度我先放心架!

返到秘密機地休息一陣，就到今晚特備節目「見家長」。本來都好好，諗住安全完成任務，點知... 當我地慶高彩列話比四大長老知我地張帖個款就出事啦! 因為我見到巨人爸爸面色一沉... 唉! 佢唔係太鐘意個顏色。原因係「唔係鮮紅色!」本來小巨人堅持唔轉(因為佢知我鐘意)，不過算啦... 因為咁少事攪到巨人爸爸唔開心就唔好啦! 我地就下囉，又唔係咩野事... 跟住又到蘇太太提議我地用同款利是封，唉... 帖係送架咋，未必有利是封架!

真係比長老們激死... 都唔知好嬲定好笑! 哈哈!

(不過轉左帖個款之後，我返到秘密機地，揾返郭生之前嘅剩餘物資，竟然係有同一個公仔，fit晒! 一次過滿足晒呢兩位長老嘅要求啦! 攪掂!)

免找數簽賬額

今日去左探爺爺，因為係佢「搬新屋」大日子，希望佢同麻麻住得開開心心，唔駛擔心我地架啦!

我諗到點樣罰蘇小弟，就係要佢送「西田百貨公司無限免找數簽賬額」比我! 佢梗係唔敢拒絕我啦(想死咩)! 我可以瘋狂購物，好爽呀! 梗係「唔好蝕」買埋小巨人嗰份!

最後... 我買左「印度薄餅」一份，價值$19，返去同小巨人慢慢嘆! 嘻嘻!

試妝(一)

第一次去試妝，心情有一點緊張... 好在一早已經約左小蒲陪我。

不過辛苦佢啦... 我知道陪人去真係好無聊，因為化妝師最先要完成底部先可以開始第一個妝，呢個程序都要個半鐘。好彩佢已經帶左「交嚮情人夢」陪佢。

今次呢個化妝師可能推祟自然，所以啲妝係偏淡。就算我同佢講左我唔介意試濃妝同厚啲粉，佢都係好輕手。都係我自己問題，因為我有大細眼同勁雀斑嘅問題呀! 最後小蒲意見係「唔夠sharp...」我都覺得好似仲差d野咁...

其實我都想搵多個比較下，所以搵左他他個推介。不過人地無期，好彩佢仲有個「拍拿」可以介紹比我，而且價錢合理，就約左下個星期二。唉... 如果都係唔得，唔通真係要揾他他出山?

挑戰記錄

近來小巨人好忙，出左名係工作狂嘅佢日日都早出晚歸，其實我係懷疑佢想挑戰記錄... 我地「最遲開飯記錄」! 結果今日好出色，時間係01:20am，真係餓死人!

難得佢仲問我今日有咁多時間，做咩唔趁機會煲湯... 真吹漲!

是日晚餐 (宵夜?)
1. 豆豉鯪魚炒油麥菜
2. 三C炒粉C
3. 洋蔥炒蛋
4. 豆腐雜菜羹

好味道!

夜

夜晚去左搵柏師奶，順便會一會返左鄉下六個星期嘅鬼仔(鬼佬們真好... 放假真係放假)，不過佢好早就要歸家休息。剩低我同柏師奶對住迷人夜景談心、談心。

就算去到邊個國家都好，我真係發覺無咩國家或者地方嘅夜景可以比得上香港。(上海都唔錯，可惜太多人。) 始終都係我嘅hometown最好!

難怪每次去玩外邊返黎，都有想喊嘅衝動。

我的姓氏

蘇氏

歷史來源
「蘇」源出
一 ﹕「蘇」出自「己」姓。以國名為氏，據《元和姓纂》所載，周武王時，司寇忿生，受封於蘇國，後遷於溫，稱為蘇忿生，春秋時，蘇國被狄族所滅，其子孫以國名為氏。

二 ﹕ 為鮮卑族複姓所改。據《魏書．官氏誌》所載，南北朝時，北魏有代北複姓「拔略氏」隨魏孝文帝南遷洛陽後，定居中原，代為漢姓「蘇」氏。

家族名人
蘇秦 （前？～前317）
字季子，洛陽人，戰國時縱橫家。與張儀同學於鬼谷子。早年曾外出遊說，然窮困而歸，後佩六國相印，為縱約長，使秦不敢東出函谷關，達十五年之久。後客於齊，被殺。

蘇武 （前143？～前60）
字子卿，西漢杜陵人（今陝西省長安縣東南）。武帝時出使匈奴，單于脅降，不屈，被留十九年，仍持漢節。昭帝時，匈奴與漢和親，始得還，拜典屬國。宣帝立，賜爵關內侯，圖形麒麟閣。其著作流傳於今者，有詩四首、答李陵詩及別李陵等。

三蘇
宋蘇洵與二子蘇軾、蘇轍皆有文名，世稱為「三蘇」。宋˙蘇軾˙次韻子由使契丹至涿州見寄詩四首之三：「氈毳年來亦甚都，時時舌問三蘇。」醒世恆言˙卷十一˙蘇小妹三難新郎：「老蘇生下兩個孩兒：大蘇﹑小蘇。……天下稱他兄弟，謂之二蘇。稱他父子，謂之三蘇。」

蘇軾 （1038～1101）
字子瞻，宋眉州眉山人，為蘇洵長子。詩、詞、文、書、畫均有名，為文雄渾奔放，詩亦清疏雋逸，為北派大宗。王安石倡行新法，軾上書痛陳不便，得罪安石，被連貶數州。在黃州時，築室於東坡，自號東坡居士，後累官至端明殿侍讀學士。卒諡文忠。著有東坡集、東坡詞等。

地望分布 河南河內郡，陜西扶風郡，陜西武功郡。

中華百家姓一覽

悶到發瘋

自從寶寶去左瑞典同英國，加埋阿仔去左法國搵嘟嘟姐之後，我email信箱收到email數字直線下降。

今個星期日日等運到。一收到order立即起動，工作效率突然「標」升。可惜4日以黎都接到上頭命令一隻手都數得晒。

我唯有向網絡出發，瘋狂上網，不過都係悶到發瘋!! 日日係咁都唔係辦法...

「你地快啲返黎啦!」

感激我遇見

今日終於可以同菲比聚一聚，佢難得返黎幾個星期，可惜無義氣嘅我忙住上個月精彩之旅而無出黎陪佢... 結果又要到佢就黎返加拿大我先可以出黎現面。

只見幾面又點可以慰解我地「相思之苦」! 所以趁食飯之前我同菲比講左好耐電話。聽完之後，我好擔心呀! 希望佢快啲解決晒所有問題，名正言順做個「幸福笑奶奶」! 支持住呀!

糖糖話我知今次仲有個神秘嘉賓--東大哥，因為佢想見下我同菲比。想一想，原來自從返黎同佢過完一個happy new year之後，我地都無見過面，足足六年啦! 所以我都好期待今次飯聚。東大哥見到我就話我呢幾年一定過得好開心(因為佢見我肥左...嘻嘻!) 係喎! 又比佢估中... 大家咁話啦!

東大哥又提起佢澳洲時期嘅朋友都已經各散東西，有啲仲避而不見。好慶幸我同卡文、糖糖、海倫、菲比仍然咁努力維繫大家感情，都係多得張「麻雀枱」。

雖然大家外貌有變、世界又變、時光又可變，我都感激我遇見喔!

無家可歸

鑰匙被小巨人沒收了，今日有秘密基地歸不得! 慘!
(其實係佢大頭蝦，攞錯左我抽鑰匙都唔知。)
本來呢個係好機會約朋友仔，可惜...

(想)搵夏太... 都係唔好阻Summer baby覺覺豬!
搵小花貓... 已經煮緊飯等老公仔返!
搵菲比... 已經沖完涼等睇電視!
搵小蒲... 已經晌屋企等緊食美味蒲媽飯!
咁又係，我咁夜先放工，邊度會有人仲有時間應酬我呀! 唉!
好彩我仲諗起一個好朋友...

麥當奴叔叔! 我愛你!!
板燒雞腿飽! 好味道!!

冷戰

事件仍未解決，仲要我表演「怒擲」公仔，
「唔要啦! 好叻咩!!!」(細個成日出現嘅對白)

好耐未晌屋企表演發脾四，
雖然蘇太太都幫口力勸我原諒蘇小弟，
不過我今次真係... 嬲嬲嬲呀!

冷戰中!

好嬲呀!

今日終於攞左餅卡，價錢比會展價還要平。又攪掂一樣，好野!

但係激死我，蘇小弟問我可唔可以比返對公仔佢呀! 「你個衰仔，有無攪錯呀!」我嬲死佢呀! 因為我之前已經問清楚佢，佢話無問題我先好開心咁接手! 佢竟然話佢比錢我買過，一係佢自己出去買過... hey!!! 咁佢又要用多左錢買另一對。

唔係呢個問題呀! 我嬲係佢係咁講$$$$，同埋對公仔義意係佢送比我 (我唔介意係佢個朋友唔啱用!!) 呢對公仔我唔係特別鐘意，但係因為佢送比我，所以我好鐘意! 「蘇先生! 你明唔明白呀?」小巨人都無激到我咁嬲呀! 越講越想喊呀真係!

之後「嬲」到爆燈去買hard disk錄影機，蘇小弟碌左佢張卡以消我心頭之憤，但係呢四千蚊都未能抵消我怒火。我仲好火呀! >_<

大功告成

終於揀好晒啲相，心情由緊張萬分到鬆一口氣。

原本約好左下午2:30去到新天地揀相，點知琴日佢地打黎，竟然漏左上半場啲相，叫我地5:00先上去。點知今日我同夏太shopping之際，又收到佢地電話，話啲相沖晒效果唔係幾好，問我地可唔可以聽日先上去。

當時我地已經晌又一城「遊」左好耐... 真係火都黎埋呀! 人地兩日已經有相睇，我都比足時間佢地，兩個星期之後先睇。點解仲可以咁架? 最後我已經失去理智，一於「摌」上去先算。

一開始已經要求新天地十月比到相薄我地，可能佢地呢次做錯野，所以好爽快應承左。之後開始睇相，其實佢話有問題的只係小問題，我都都可以接受的。仲有我對「鐳射眼」好勁，一開始已經「out」左好多。其實啲相唔係唔靚，不過之前做左功課，同自己講: 唔靚，out! 單人相，out! 同一個境，out!

就連個姐姐第一次幫我地數相都唔夠數。不過姐姐態度very good，一啲唔高興都無，仲同我地一齊研究。我諗其中一個原因係佢地有做錯，所以都唔好意思迫我地。我見其他人揀相係完全跟貼架，我地個姐姐就成日走開比時間我地慢慢揀，可能我地今次真係因禍得福。佢地張單寫到咁亂，竟然又益左我地多左2張大相... 嘻嘻!

最後係加錢項目，我地影左啲中式服，我覺得影到我同小巨人好攪笑，雖然貴左啲，我地都揀左幾張。最後埋單盛惠$1,112! 「新天地」全程由落單到揀相都令我好開心, good呀!

咁高興，我地拉埋夏太去慶工! 可惜只得food count有位... 不過我地都好滿足! yeah! yeah! yeah!