一件壞事

原來我有兩個月無上廠啦... 今日就上吓去... M主任真係好討厭, 原來真係有"見佢後面, 憎佢前面"... 討厭, 討厭, 討厭, 討厭!!!

我今日做左一件壞事... 放工返香港o既時候, 無等佢就走左啦! 呵呵呵!

我做左壞事, 但係我好開心! 呵呵呵！

當年今日

唔經唔覺, 原來我八年前今日去左澳洲o既Adeliade, 開始我人生新一頁... 諗起嗰啲日子, 講一日一夜都講唔完... 真係好開心架!!!

好玩的事:
- 去Rundle Mall行街街
- 半夜去Victor Harbor睇企鵝
- 成日去Central market買"食送"
- 同阿Nok兩個人搭巴士去Handrof
- 飲完酒, 晨咁早去Port Adelaide買魚
- 去Glenelg玩
- 去摘士多啤梨
- 去郊遊, 上大木馬睇風景
- 表哥帶我同Phoebe去睇袋鼠同樹熊
- 去Henley Beach睇日落,嘆咖啡
- 去摸蜆
- 去河邊餵鴨仔
- 同家姐去黃金海岸, 可以抱樹熊

難忘的事:
- 落到機先發覺無屋住...
- 第一日出去食飯, 有個friend壞車
- 第一日已經識到十幾個新朋友, 有啲連名都唔記得
- 暫住Karmen間房, 仲有Wayne, 阿心, 四個人只有我一個第二日要返學
- 極速晌兩個星期內搵到第一個新居
- 新居日日一大班人黎飲酒... 我地懷疑可以飲晒一生所有quota.
- 比人o厄$$
- 獨居三個月
- 夏天好熱, 四十幾度... 晒溶
- 去捉蟹, 食fish & chips
- 識到Phoebe, 仲開始認香港人以外o既朋友
- 同同學仔開party
- 失戀
- 我瘦了很多
- 入大學讀到我鐘意o既科目
- 成日唔返學
- 煮飯好叻, 可以煮十幾人飯
- 搵屋搬, 睇左不下五十間, 朋友圈中破晒紀錄
- 誤打誤撞之下搵到新屋
- 搬屋... 好多野攪
- 成日開通頂做功課
- 成日臨急抱佛腳
- 倒數返香港O既日子
- 同Paul/Sue一家同Karmen/Candy住得好近
- 成日去Paul仔屋企痴餐
- 睇奧運, 電視成日播馬術
- 成日同Phoebe, Candy, Karmen, Helen & Shirley開party
- 又再失戀
- 上山頂睇月蝕, 之後晌隧道甩左個車"碌"
- 終於畢業, 但係啲畢業相唔靚

雖然只有短短三年, 但係對我黎講, 嗰幾年真係令我成長起來, 好似領悟好多道理, 見識都多了... Thanks, Mum & Dad!!!

In & Out

八強終於都知道晒啦... 分別係德國, 阿根廷, 意大利, 烏克蘭, 英格蘭, 葡萄牙, 巴西同法國. 其中六隊都已經攞過冠軍, 所以到八強賽事場場都好勁!

好開心法國最後可以贏到西班牙, 因為真係越打越好! 我重以為佢地會敵唔過分組賽好出色o既西班牙... 真係估佢唔到! 下場會對巴西, 我真係好想知道, 有無其他國家隊可以打敗巴西呢? (我唔係巴西fans, 只想知道...)

最慘係Socceroos... 臨完場幾秒鐘, 竟然輸個十二碼比意大利... 天呀... 攪到我係咁對住個電視 *&%@@*@... 唉...

不過我覺得佢地已經有好好成績, 唯有等下次啦!

交換情報

今晚同未來何太 & 譚美食飯傾計, 竟然傾到人地餐廳就黎收舖... 因為好耐都無"交換情報"! 以前身份都可能有啲敏感, 依家直情可以暢所欲言!

其實所有事都對我無影響, 不過在於我正式出黎做野o既第一間公司, 我仲係好關心的. 因為有好多快樂時光, 同埋識到好多朋友, 我學到打工同讀書o既分別, 最重要係我晌嗰度識到小巨人... 不過呢個地方可能好快就唔存在, 因為佢地要搬入大埔! (又係大埔??) 見到舊公司要去到呢個地步, 真係覺得有啲可惜... 不過可能都係一條生路!

我o既第一個老闆好好人, 但係唔係一個好波士!
我o既第二個老闆好似好人, 其實唔係個好人, 更加唔係一個好波士!
我o既第三個老闆係一個老人, 人人都話佢係一個難頂o既好波士!
不約而同係, 我入左佢地間公司之後, 業績就每況愈下...

哭了

點解? 點解? 點解... 人類可以預料未來嗎?

點解? 點解? 點解... 將來的事會有人知道嗎?

點解? 點解? 點解... 人生一定要計劃的嗎?

點解? 點解? 點解... 我自己的事是我自己掌握的嗎?

今日情緒失控, 喊左成日! 要小巨人受苦了!
Sorry...

十六強

終於都知道世界杯十六強啦!
1. 德國 vs 瑞典
2. 阿根廷 vs 墨西哥
3. 英格蘭 vs 厄瓜多爾
4. 葡萄牙 vs 荷蘭
5. 義大利 vs 澳洲
6. 瑞士 vs 烏克蘭
7. 巴西 vs 加納
8. 西班牙 vs 法國

今日開始第二輪激戰! 德國 vs 瑞典... 準時開波!
oh! 有排唔洗瞓啦!

返黎啦!

另外一隊令我好留意出唔出到線o既係法國隊, 因為有亨利同韋拉!

就連蘇小弟都好緊張, 三點鐘起身睇, 我就係比佢o既叫聲嘈醒, 起身睇埋一份! 但係我對眼都只係支持到半個鐘左右, 好好彩, 仲可以睇到韋拉同亨利入波... 亨利返黎啦! 見到佢回勇, 真係好高興!

不過我呢... 朝早起身好似無瞓過咁... 頭痛中!

出線啦!

好開心! Socceroos 終於出線啦! 其實只要佢地賽和克羅地亞就可以出線... 但係竟然兩度比人超前! 好彩臨完場比基維爾迫和! 場波晌三點鐘打, 所以無睇到. 不過起身第一件事就係睇精華, 知道佢地兩度落後好心急... 追平一球我又大聲叫, 好似睇現場咁... 連Dad都出黎睇咩事!

下場會對意大利... 可能都唔會再進級! 不過已經好好成績啦! Aussie Aussie Aussie! Oi Oi Oi!!

(支持澳洲隊係咪好冷門呢?? 睇左佢地幾場比賽, 佢地技術唔係好好, 腳法又唔係好秀麗, 但係唔服輸o既精神令我好佩服! 真係忍唔住要支持佢地呀!!)

例行工事

夜晚去同小巨人啲friend食飯, 因為同肥雞(佢好好人架!)慶祝生日.

不過之前差啲攪到小巨人發脾氣... 因為只有佢一個人攪, 其他人完全唔在乎, 成班識左十幾年, 仲會有人問係邊個生日, 又會有人明知道都唔出聲等人搵, 久而久之... 之後每次都只係例行工事. 出到黎, 你有你打機, 我有我玩電話, 又會有人show off... 比比比... 有咩好比呀! 你好叻咩??? (哈哈...越講好似越激... 都係收聲好啲! 唔係做左巴士阿叔... 會比人打架!)

其實我有時都會諗... 朋友應該係咁架咩? 係咪佢地已經將感情昇華, 一切盡在不言中呢? 係咪我睇o既只係好表面, 呢個係佢地相處方式呢? 諗多左啦... 好彩, 我啲朋友唔會咁對我... 呵呵!

仲有要祝肥雞生日快樂, 我見小巨人之前買左野請佢食, 之後竟然唔記得左... 好失魂! 大偉搵件德國隊波衫好靚... 等我又買件比蘇小弟生日先!

Try My Best

今日同未來何太玩msn, 我地玩左成個下晝, 佢宣佈同里玉下年一月結婚啦...啦...啦...! (真係好, 同蕃茄的大日子好近, 減肥可以一炮過!) 我好開心架! 因為一入舊公司就識佢地, 有段日子玩得好埋, 成班舊同事又一齊玩. 雖然依家無見咁多, 但係都好多野講! 佢仲話依家舊公司有好多野唔同左... 我地已經約埋譚美下星期一坐底慢慢講到飽!

佢都有問到我同小巨人會幾時, 並實好多人都問 (我唔會覺得煩架, 好開心啲朋友咁關心我添!)... 不過我都唔知呀! 因為要考慮好多野... 我只可以講我已經 try my best 為將來努力中! 我諗總有呢一日, 唯有叫啲friend等下啦! 有啲說話好似好老土, 但係又好多道理... 人生大事, 唔可以急, 仲要雙方配合.

放工去左返gym course! 好攰! 但係不停流汗o既感覺好"正"! 滴呀... 滴呀... 沖完涼真係好舒服!

什麼是瑜珈?

瑜伽是一種修練：通過身體的動作、精神的培養；協調身心，達至心境平和，身體健康。

依家每個星期二都好期待我o既瑜珈堂! 尤其因為晌office坐得太多, 周身痛o既時候... 未開始返學時, 可能平時太少運動, 竟然試過背脊痛到郁唔到, 但係又諗唔到可以點做! 不過玩完之後, 我就無痛啦! 但係我只係當做一種伸展肌肉o既運動, 因為我太唔集中精神, 人地晌度靜思, 我就成日諗幾時完... 所以我應該唔係一個好學生!

咁好玩, 梗係唔好比佢停... 但係7月中到8月尾無得上堂, 所以呢幾日好努力搵其他中心上堂! 希望快啲有消息. 原來出面有平有貴, 貴到處$200/堂都有! 同埋質素都好參差... 唔知點搵先好!

仲有做完之後, 夜晚真係好好瞓... zzzZzZZZ

美味果汁

今日又報左名下期o既yoga, 點知要八月尾先開始... 所以暑假期間應該好得閒! 今次除左我同他他, 仲有小神童, 蕃茄 & 他他個朋友都join我地, 應該大家互笑, 會好開心! 原來工聯會有好多野學, 趁暑假有個空檔, 等我又學樣野玩下先! 其實我好想學手工藝... 不過有啲上堂地點好遠, 所以要再諗下先 (籍口)!

跟住我地去左太子食飯, 我地係咁笑, 因為平時就係我地三個去出去食lunch (有時加埋公主同事)... 但係又係幾個女仔就算日日見都好, 都有講唔完o既話題! 可能我地差唔多年紀, 又同期入公司, 所以睇o既野都好似 (好似公司文化, 其他人做野方式咁)... 他他好靚女, 更勁係佢多才多藝, 仲係化妝師, 問佢咩都識! 小神童就好靜, 我地以為佢唔鐘意講野, 點知原來係慢熱, EQ仲要好高, 點激都唔嬲, 好有"高人"feel架!

自從上兩個星期, 他他玩搾生果汁之後, 我地成日都研究有咩生果蔬菜汁可以溝! 咁o岩今日晌間餐廳度見到"荀"野! 哈哈!

父親節快樂

今日係父親節, 我地成班同公公慶祝, 我知道佢今日好開心. 初時佢話唔使同佢慶祝, 不過後來心郁郁, 好開心同我地去食飯. 蘇big仲買左個蛋糕去公公屋企... 笑到佢見牙唔見眼! 但係蘇老大今日要返工, 所以我地要搵其他日子等齊人先慶祝.

我覺得我同蘇老大性格都幾似, 所以有時糖痴豆 (咩都研究下), 有時又火星撞地球 (因為只有我敢頂狀佢)! 不過, 我諗佢做咁多野都係為我地好, 雖然好多野都唔會同我地商量 (因為"大皇"係唔需要問人意見架, 想點就點...) 我知道全家無人會出聲, 通常只有我忍唔住... 所以... 我諗我都係佢o既頂心杉... 哈哈!

祝天下父親, 父親節快樂!!

單車

歌手：陳奕迅 | 作曲：柳重言
填詞：黃偉文 | 編曲：柳重言

不要不要假設我知道
一切一切也都是為我而做
為何這麼偉大　如此感覺不到
不說一句的愛有多好
只有一次記得實在接觸到
騎著單車的我倆　懷緊貼背的擁抱

難離難捨想抱緊些　茫茫人生好像荒野
如孩兒能伏於爸爸的肩膊　誰要下車
難離難捨總有一些　常情如此不可堆卸
任世間再冷酷　想起這單車還有幸福可借

經已給我怎會看不到
雖說演你角色實在有難度
從來虛位以待　何不給個擁抱
想我怎去相信這一套
多疼惜我卻不便讓我知道
懷念單車給你我　唯一有過的擁抱

難離難捨想抱緊些　茫茫人生好像荒野
如孩兒能伏於爸爸的肩膊
哪怕遙遙長路多斜
你愛我愛多些　讓我他朝走得堅壯些
你介意來愛護　又靠誰施捨

難離難捨想抱緊些　茫茫人生好像荒野
如孩兒能伏於爸爸的肩膊　誰要下車
難離難捨總有一些　常情如此不可堆卸
任世間怨我壞　可知我只得你
承受我的狂或野

婆婆就係晌上年o既父親節離開我地, 不經不覺已經過左一年...

得左!

今日好眼瞓... 因為琴晚要支持英格蘭對千里達! 蘇小弟更加心急, 因為佢要返工所以睇唔到. 我地終於發現3G電話好好玩, 我成晚久唔久就"直播"賽事精華比佢睇! 佢同班同事知道入球都好緊張... 仲晌office大叫!

本來我諗住打和, 因為英格蘭攻極都唔入, 又錯失好多機會... 好彩到82分鐘高洛治頂入, 再加謝拉特完場前勁射... 終於贏左! 依家安心出線十六強! Yeah! Yeah! Yeah!

不過唔知會唔會之後對德國... 好緊張! 快啲知道就好啦!

一對活寶貝

今日同蕃茄去左探一個老朋友--童心, 佢係我做暑期工o既朋友, 都好耐無見. 諗返起...其實都幾得意. 我介紹左童心比我啲朋友識, 之後熟絡左, 成日出去玩. 佢仲同其中一個friend拍拖. 不過最後分開左. 後來童心就同佢依家老公搬左入石澳, 所以好少見面.

前幾日收到佢sms, 所以我地聯絡返... 其實, 我地除左我做暑假工嗰三個月之外, 我地相處時間唔算多. 不過, 可能就係緣份! 我知道之前童心有好多hard time, 但係我都唔可以同佢分擔到啲咩... 不過見到佢依家有個幸福家庭, 佢老公又咁錫佢, 真係"登"佢開心!

依家佢已經有一對活寶貝--瑤瑤 (3歲) & 童童 (歲半). 同佢地相處左一個晚上, 感覺好得意. 因為同童心講起佢兩個性格都唔同... 家姐好乖, 又好錫妹妹, 不過童心話大女要人氹. 細妹就好醒目, 有啲固執, 但係好硬淨! 原來咁細個已經可以睇到性格... 真係三歲定八十!

所以唔好以為一個人可以改變到另一個人, 因為我都相信性格係天生架.

活著便有希望

被喻為當代最偉大o既科學家－霍金，到左香港啦! 對我黎講, 佢o既科學理論我當然唔識, 只係知道佢黎香港. 不過, 今日無意中見到報紙引述左佢以上嗰句說話, 令我覺得好感動!

點講呢... 其他人可能覺得講呢啲說話好容易. 但係對於霍金身體有咁大障礙又咁偉大o既人黎講, 真係覺得佢好厲害. 所以, 今日工作上雖然有唔開心, 不過又算啲咩呀... 都係快快手手攪掂佢! 之後心情好左好多! 放左工仲可以快快樂樂做gym去!

嘩! 今日好似見到有條彩虹!

好邪!

以前對法國隊無咩好感, 不過自從睇阿仙奴睇得韋拉同亨利多, 我依家都會睇佢地比賽 (支持, 支持!). 可惜, 法國隊自從98年攞左冠軍之後, 都無晌世界盃決賽週再入過波, 究竟係咪有咀咒呢? 好似好無聊, 但係又似層層, 好邪! 好似琴晚對瑞士0比0, 雖然有一分, 但係都無波入架...

亨利比人話佢有大賽失準症, 總知就係無平時晌阿仙奴打得咁好... 點解? 點解? 點解? 快啲回勇啦, 唔好比人睇死呀! (瘋狂球迷肉緊地咬牙切齒 + 大聲吶喊!!!)

Socceroos

Aussie叫足球做Soccer, 國家隊叫Socceroos. 因為Football 已經比佢地refer做本地另一種比賽 (有啲似美式足球, 攬住個波四圍走, 但係無"盔甲", 著背心架), 可想言之佢地有幾"重視"足球.

我有問過澳洲人, 點解佢地唔太重視足球, 佢地話因為佢地鐘意有多啲身體踫撞同多啲分數o既運動, 即係好似佢地本地足球同欖球. 不過依家可能會令多啲澳洲人重視返!

試諗下... 如果上半場已經1比0, 直到下半場只係剩返六分鐘就完場係唔係就代表輸梗呢? 有無追返平手o既機會呢? 原來贏都仲得呀!

Socceroos上半場比日本隊領先1比0, 直到84分鐘 (完場前六分鐘), 卡希爾追成平手... 我以為已經係奇蹟, 點知89分鐘, 又比佢入多一球, 2比1... 都無得追啦! 補時92分鐘... 又入啦! (因為日本已經散晒咁滯!) 完場結果竟然係 Socceroos 贏3比1, 好勁呀!

只係得我一個人睇, 但係已經叫到拆天... 我諗現場啲fans一定癲晒!!! 嘩!!! 贏到日本隊, Socceroos 仲有機會出線添呀!

獨食

論到荷蘭出場啦! 佢係我以前勁鐘意o既球隊... 因為有柏金! 第一場對塞黑 (歐洲vs歐洲球隊). 以前有柏金, 梗係場場都支持佢地. 不過自從佢無打國家隊之後, 我都好少欣賞荷蘭比賽... 好彩仲識幾個! 最後靠洛賓一個好波, 1比0完場!

其實有啲失望, 因為洛賓入完波之後, 全場都好似佢個人表演咁... 只得佢一個射波, 最慘又射唔入! 咁獨食, 真係唔得... 完全無以前啲feel! 失望! Mmm... 都係全能足球, 不過得佢自己一個囉!

今日都係快啲返屋企支持 Socceroos, 會對日本!
Aussie Aussie Aussie! Oi Oi Oi!!

幫手打氣

相信全香港最受歡迎o既國家隊都係英格蘭, 所以琴晚第一日出場, 已經成為全城話題! 我都好鐘意睇佢地. 雖然星期六約左人, 但係都急急腳返屋企睇電視. 唔知係唔係有關係, 平時"勁"多人o既43B, 竟然無咩人, 就連晌街上面o既行人都好似少左好多...

好可惜, 我返到屋企已經入左波... 我miss了! 原來晌開波四分鐘英格蘭已經因為一個烏龍波領先! 直到完場都無再入球. 不過, 唔理佢呢場好波唔好波都好... 最緊要贏啦!! 雖然之後無再入球, 但係我同蘇小弟, 蘇老大同蘇big都睇到好投入. 因為無論英格蘭進攻定係比巴拉圭攻緊o既時候, 我地都係大叫! 哈哈!

到左第二場, 係瑞典vs千里達, 賽前一致睇好瑞典, 仲係狂數嗰隻! 我都掙扎左好耐, 但係為左龍格保, 決定捧佢半場... (即係睇完上半場瞓覺)! 點知... 原來真係估佢唔到... 0比0呀! 我仲睇足全場. 未試過覺得無入球o既賽事咁好睇.

比人睇死o既千里達, 比人話d球員無實力, 又過氣, 又老, 仲要有出名玩到不知所謂o既約基, 真係無咩希望, 但係原來好有隊形. 每個球員都好努力. 下半場仲要打少個人... 不過佢地可以跑到我完全唔覺得! 我都為佢地打氣, 希望佢地守得到! 完場嗰陣, 成隊波好似贏左咁高興!

波係圓架! (by 伍晃榮)

街市一遊

今日雖然有英格蘭大戰巴拉圭, 但係約左公主, 安妮太太, 他他, 小神童 & 舊同事J 打邊爐, 所以下晝就入左荃灣!

因為要準備打邊爐關係, 所以要去街市一遊, 原來我好耐都無真正去過街市... 正正黃金時間, 所以好多人! 要成日對住血淋淋o既內臟同周圍都充斥住血腥味道o既街市都幾嘔心! 我只係覺得又焗又熱, 想快啲離開...

其實, 我應該要有啲慚愧, 因為蘇太太就係晌街市做兼職養大我地, 仲要一日兩份工... 真係好辛苦. 所以我以佢為榮, 識到啲新朋友都極度推介蘇太太o既威水史. 依家我地個個都有野做, 都叫蘇太太做全職師奶, 但係嗰段日子佢反而唔慣, 所以依家就當打發時間... 今日街市一遊, 令我覺得"媽媽真偉大"!!

最後, 多得安妮太太同他他, 我地終於炮製左一餐好豐富o既打邊爐! 竟然仲有飯後甜"飲"... 火龍果+士多啤梨+益力多! 好好味!

第一天

終於都開幕啦! 好大個球場, 好多人... 場面盛大! 最後細佬o既至愛德國隊以4比2贏左哥斯達黎加.

我都無諗過依家德國玩大比數! 睇得蘇小弟好肉緊, 因為全晚不停晌度大叫... 全屋都聽到佢把聲! 到左德國比人追和嗰陣, 仲自己自言自語話... 打成咁點對強隊呀... 完全係瘋狂球迷! 而我呢... 睇完上半場德國隊2比1之後, 就中場休息... 瞓到今朝啦!

今晚9點英格蘭對巴拉圭, 準時開波!! 咁早我今次應該唔會瞓著!!!

黑色暴雨警告

隨住今日黑色暴雨警告o既來臨, 心情都跌落谷底... 連今日要上堂做gym都無去. 我覺得工作有好多挫折! 其他人覺得好少事, 但係我覺得好down. 因為好似知道無論我做咩都好, 都唔可能改變, 一個人o既力量始終太渺小... 唔可以抱任何希望!

但係...我又諗, 唔通咁就放棄? 唔可以... 最後, 我搵到金句啦 -- "忍無可忍, 還需再忍!" 仲貼左晌電腦度.

都係唔可以比呢d鬱悶o既情緒影響我迎接世界杯o既興奮心情!! 仲有得閒玩下我副新眼鏡... 讚下自己好型!唔知我幾時先學到"天天都有好心情"呢? 要笑下先得... 哈哈... 嘻嘻... 呵呵... 嘩嘩!

(但係依家已經有d眼瞓... 世界杯, 唔好走呀... zZZZZzzZ)

開波啦!!

等左四年, 今日終於開波啦! 今年第一場係蘇小弟o既至愛德國(主辨國)vs哥斯達黎加, 照理係德國sure win, 但係世事無絕對, 所以希望會有場好波睇下啦. 之後仲有d好精彩o既"戲碼", 例如: 阿根廷vs荷蘭, 西班牙vs烏克蘭, 英格蘭vs瑞典... 好似好好睇!

今年o既吉祥物叫Goleo VI, 係一隻獅子. 但係德國人就好唔鐘意佢! 因為呢隻獅子竟然係無褲著的, d德國人又話佢有大肚腩(啤酒肚), 影響到佢地國家形象... 實在太攪笑! 仲因為佢唔係太受歡迎, 所以攪到個製造商破左產 (好勁...)

不過我覺得都唔係太差啫, 睇真d, 其實都幾可愛!! 反而我覺得佢頭上面有個樣 (有個大大大口架) o既足球恐怖d... 呢個足球應該係一個"鬼佬", 因為佢對眼係藍色的!

Collection

以前細個咩都可以儲一餐! 信紙, 貼紙, 集圖冊, Yes卡, Pins, 襟章, 郵票, 書籤... 最記得o既係"舊利是封"! 當時d利是封係無依家嗰d有公仔咁靚的... 但係我都儲左一大箱, 全部係我o既寶貝, 其他人唔可以攪架!! 仲有得閒攞出黎欣賞... 嗰陣幼稚園高班左右啦!

依家呢門嗜好竟然轉移左去蘇太太度, 不過係新o既利是封, 佢話驚第時無喎, 所以依家要儲定. 竟然成個櫃都擺得滿滿的... 好勁! d利是封通常都係印當年o既生肖, 我地試過搵到一個loop之前出o既版本 (即係今年狗年, 我地搵到上次狗年[十二年前]出o既利是封... ) 真係勁架, 因為保存得好好, 好似新o既一樣! 呢d稱為"絕版", 有$都買唔到...

呢套大口仔波衫匙套好得意! 但係儲得幾多呀... 晌度貼下就得啦!

吞pop半天

朝早難得去尖沙咀開會, 11點幾已經完左. 我同公主當然唔放過呢個吞pop好機會, 梗係要搵個好地方坐下. 我地去左LCX嗰間stage cafe, 對住無敵大海景! 雖然天氣唔多好, 但係都可以清楚睇到對面岸...



我地食完lunch仲去左faceess搵翠斯, 可惜佢好忙, 唔得閒同我傾多幾句. 可能時間尚早, 成個商場都水淨河飛, 同星期六/日兩回事. 咁樣行街都幾舒服! 但係發夢無咁早... 下晝仲要返公司! M主任返左黎, 一定有排煩!



果然不出所料, 我比M主任煩死, 尤其今日Pushy晌度, 佢梗要做返d野. 即係有時"捽"下我點解無打呢個字 (我咪問左你有咩想加o羅, 大佬, 你又唔睇... 你老細問完你又走黎"捽"我, 我知就做左你個位啦!), 再唔係就同一樣野叫我做3次! 今日真係好想爆粗 #@%^&&#@*

消磨時間

今日開始去上堂做gym, 雖然我已經有"健體金卡", 但同報左course上堂感覺好唔同. 可能迫住有d野做咁!

已經計劃好晒... 成個六月都會好忙!
星期二: Yoga
星期三: Gym
星期五: Gym
星期六: 大埔
星期日: 探公公
仲有等左四年o既世界杯都係今個月舉行! 只剩返一個星期就開始... 好開心! 又可以嗌餐飽! 我將所有weekday要上堂o既日子highlight晌個月曆度, Jody話我好似人地失戀咁... 哈哈! 因為成個月曆highlight晒咁滯!

我要學下用自己方法消磨時間, 唔可以日日都留晌公司了...而且我終於可以訓練下自己早d放工! 個個都話我做咩咁遲都唔放工, 其實我都唔知點解! 以前就話等小巨人, 依家唔洗等, 可以早d, 點知都係差唔多! 可能我個人無咩時間觀念... (成日遲到d衰人就係我!!)

第一堂感覺"良好", 老師比我同蕃茄上嗰個好好多... 流左好多汗! 雖然小影今日唔得閒, 只有我自己一個上堂, 但係都好好玩, 仲可以慢慢行返屋企! 當做多d運動!

方力申: "日日運動身體好, 男女老幼做得到!"

下雨天

香港o既雨季正式降臨, 即係夏天又到啦! 呢幾日陰晴不定, 朝早起身都仲好似未天光... 唔只我自己, 身邊每個人都好似無o羊生氣! 太陽伯伯去左邊呀?

記得細個嗰陣好鐘意落雨, 因為可以淋雨... 成日都o厄蘇太太話無帶遮. 其實個心好開心, 街上面好少人, 跑跑跳跳... 衝呀衝呀! 好好玩! 有時候又會晌門口睇吓d雨幾時會由走廊"撇"到門口, 好緊張架... 每隔一陣就要開門偷睇!

好懷念充滿童真o既小時候, 但係日子好似有腳咁, 已經走得好遠...