The Simpsons

終於有得睇啦!

星期日見到Bossini有特別版t-shirt賣，立即捉住小巨人睇過飽! 旺角嗰間Bossini仲有超大隻阿Bart，淨係見到都興奮。

好鐘意佢地呀!

動「慢」節

今日比小巨人強拉左我去動漫節，我之前已經拒絕左佢，點知大衛放飛機，我又點放心佢一個人去... 睇靚靚show girl呢!!!

果然係動「慢」節(=活動緩慢)，真係好多人呀! 全場都係年輕人同小朋友，情況同年宵差唔多，而且插針不入，所以更唔好講去睇野! 最詭異係入面竟然係有攤位遊戲玩，商人們真係唔放過任何一個賺錢機會。最後我嘅收穫係一條熊貓超人電話繩，如果連佢都無，真係連人頭費同腳骨力都「蝕」埋... (不過都好，可以比小巨人拖到實一實! 呵呵!)

夜晚照原定計劃去醫院探公公，初時我地都好擔心，因為佢成日都頭暈，但係入醫院又查唔到咩事。不過見到佢精神都唔錯，睇黎醫生較好藥同等同情況穩定就會放佢出院。今日佢一知道小健回歸，竟然開心到喊。我地都好掛住小健呀，熱烈等待918來臨!!!

蝦你波波

好耐都無同小巨人去行街睇戲，今日啱啱有時間，我地決定去睇「蝦你波波」。

我記得之前幾集係同「魔介」一齊上，相比之下，我都係鐘意「魔介」多啲。不過已經睇左咁多集，梗係追埋落去啦! 「蝦你」仔同佢啲朋友仔已經越黎越大個，就好似睇住佢地由小朋友變成大人，感覺好得意。

今集故事依然精彩刺激，都幾好睇，感覺無以前咁「小朋友」戲。不過令我印象最深刻嘅係凍到似雪房嘅戲院... 令我打左成晚冷震。

工作週記

我的工作週記

23.07.07 (星期一)
馬拉松會議, 朝十晚六

24.07.07 (星期二)
要嘔出會議記錄, 中間大腦便秘

25.07.07 (星期三)
會議跟進工作, 亂七八糟

26.07.07 (星期四)
返大陸, 「大支野」指天篤地

27.07.07 (星期五)
一人講一句, 唔知聽邊個先啱!

原來咁就過左一個星期... 忙到暈!

美味大餐

是日在下上班太疲累，決定休息一天。
最後由小巨人大廚出戰，美味晚餐回到秘密機地立即奉上...



晚餐非常美味豐富，謹此致萬二分感謝。
I love you, Baby!!

走了...

爺爺走了...
再也不痛苦。

爺爺，我會永遠懷念你。

第四項任務

FA Project - Mission 4: 租衫

原來好耐都無攪過我個大project... 其中一個原因係爺爺身體唔多好，令我地有好多保留。不過今日終於去左會展，終於攪掂啦! 仲有錢生+未來錢太陪我同小巨人。我揀左「新天地」，因為如果有咩事，都可以改期。好開心用左唔駛三千蚊，就有四套衫啦! 多得夏太同未來錢太，因為計埋上次送嘅晚裝，依家有五套衫。應該都夠啦...

Mission Completed!!!

之後我同小巨人去左mega box... 無野睇，好失望。不過我話如果帶埋蘇老大去，佢應該會開心到彈起! 哈哈!

藍天白雲

今日睇報紙，終於解答到我呢排心入面一個謎團... 點解呢排藍天白雲嘅日子多左咁多? 係咪落雨多左有幫忙? 定係領導人提出嘅藍天行動真係咁快有效呢?

天文台高級科學主任楊敬基解釋，高溫、吹海風分別向上空和向橫吹散大氣中的懸浮粒子，大氣中折射藍光的粒子減少，為香港帶來藍天。風向方面，6月份至今多吹南風或西南風，南風從南中國海吹來，海面空氣較乾淨；西南風先經越南、柬埔寨的陸地「加熱」才越過小片海洋到達本港，故空氣較清新之餘，氣流未趕及「過冷河」，故十分炎熱。(by 明報 [7月13日])

雖然我好怕熱，但係寧願熱啲，都希望可以成日見到藍天白雲。不過琴晚新聞報導提到，到左冬天嘅時候，空氣懸浮粒子又會增加，天氣可能變返灰朦朦...

「全城投入，為藍天打氣」

緊張大師

當小巨人十點十打比我話已經落左車嘅時候，我先記得成日只係食左一盒菜，原來今日唔記得左茶點時間。非常肚餓同軟弱無力嘅我，等呀等... 等呀等...

點解落左車行返黎都要行成大半個鐘? 打電話又無人接，心急如焚嘅我已經痴左線咁不斷打電話。只接去留言信箱嘅聲音就令我更加不知所措! 我當時諗佢會唔會有咩野事呢? 要唔要打佢巨人爸爸度報失佢個仔呢? 定係打比蘇小弟問佢點算好呢? 胡思亂想嘅我差啲急到喊起上黎...

正當唔知點好嘅時候，終於比我接通左電話! 原來... 小巨人晌返屋企途中撞到師傅，佢個電話又收唔到。但係已經痴左線嘅我又點會咁容易放過佢! 於是就晌唔知道原因嘅情況之下，佢比我關機關槍般「破口大罵」... (我真係實在忍唔住一口氣爆發左出黎!) 激死我啦! 所以我決定唔等佢自己開飯先。到左小巨人返到秘密基地，我諗我塊面已經黑過一舊炭。嘻嘻，最後見到小巨人好落泊咁去洗碗，就當打和啦!

不過我又諗，係咪我自己太過緊張呢? 平時嘻嘻哈哈嘅我，其他人都唔知道，其實當有特別事發生嘅時候，我都會向壞方面諗，係唔係我自己想像力太豐富呢?

頂

自從他他走左之後，「繼任人」登位。
肥姑已經廢，加埋傳聲筒「繼任人」真係廢上加廢!
開心快活、嘻嘻哈哈嘅日子已經隨他他離開而遠去已...

唔知係咪我地得罪左「繼任人」，
得罪左行政部真係無運行!
依家真係頂、頂、頂到上心口!

咩都唔埋，我只會「按章工作」!
吹咩!!!

升中派位

不知不覺原來最細嘅表弟仔已經要升中一啦!

今日係佢升中派位嘅大日子，如果我係個小朋友或者係父母，相信我都會好緊張。結果係表弟仔好勁呀!!! 同舅父傾計嘅時候，平時唔會表達自己嘅佢，都難掩興奮心情。佢派左去一間「勁」名校... 我都未識過親朋戚友係讀名校架，真係「威」呀!

希望中學生活可以訓練得表弟仔堅強啲! Hey, 大個仔啦!

嘔心

今日蘇碧同我提起一堆人嘅二三事，「爆料」爆到我差啲爆粗。點解人同人之間可以咁邪惡，仲要係一家人... 知道左令我覺得好嘔心!

嘔心嘅感覺真係揮之不去，最後要成晚不斷問小巨人點解我會有呢啲所謂屋企人。好彩大家關係從來都好疏離，我同蘇碧只有當八卦事去聽。之後見到呢一堆人只有點頭問好就足夠... 「冷眼旁觀」就已經係我地最好相處之道!

慶幸我有一個有啲蠢但好顧家嘅蘇碧做我家姐，同有啲長氣但係好純品嘅蘇小弟做好細佬... 鍚晒你地!

不要掛心

今日同小巨人去左探爺爺。

之前蘇小弟都有提到依家爺爺情況好差，意識好模糊。見到爺爺之後，情況比佢地提到的差不多。相比之前探佢嘅時候，真係差左好多。醫生話佢身體機能退化得好快。有時候見佢瞓覺都好辛苦，但係我地旁人亦幫唔到佢，只有覺得好無奈。

今日同我地傾計都無力，還好仲認得我同蘇小弟。我記得之前爺爺仲清醒嘅時候同我講，佢無咩掛慮，又無負任何人... 我明白的。不要掛心，請好好休養吧!

BYOB

I'm not a plastic bag...
而係比人炒貴幾十倍賺錢同爭相演野晒料嘅工具!

唔明點解人搶我又搶，搶唔到就呼天搶地!
所謂要等開門去理論，原來幾張coupon已經攪掂!
平價環保購物袋無端端變左女星玩意同潮流恩物，
好似無咩人再去留意背後呼籲人環保嘅message...
睇佢地搶野，不如睇「緣來自有機」好過!

這個世界太恐怖... 唉!

美美

今日返到屋企好驚喜，因為收到信，真係好耐都未試過啦!

「美美」係一個住晌菲律賓嘅小朋友，今年五歲，下個學期就會升上幼稚園中班。我同佢係透過宣明會嘅助養兒童計劃認識，到依家已經三年。記得第一次收到佢屋企人來信，竟然係一個壞消息，因為「美美」嘅爸爸竟然走左佬!! 媽媽又要去馬尼拉打工，所以只剩低「美美」同佢姐姐哥哥由麻麻照顧。

呢啲事係我永遠想像唔到的，所以第一次讀信時好震驚。但係，亦令我明白生命無常，幸福唔係必然的，我依家所擁有的已經係一個福份。

「美美」你要健康快樂，聽屋企人話喔!!

昨天、今天

星期六的十週年回歸晚會，本來安安定定等四大天王出場，點知比小巨人拉左出去食晚飯，亦令我錯過左如此盛會。真係令小巨人耳朵受難，因為我「哦」左佢足足兩日！

好彩如今科技發達，今日終於可以晌youtube睇返，補返數! 雖然成日都有人話邊個係新天王... 但是後來的人已經去唔到呢個級數。佢地個樣仲無咩點變，厲害！！

佢地四人一齊晌台上表演還是令人期待！睇完表演嘅片段，我仲係好似一個十幾歲的小fans般興奮中... 呵呵呵!

回歸快樂

回歸十週年啦! 今日有好多紀念活動，升旗禮、跳傘隊表演、西部通道通車、盈盈樂樂正式同香港人見面...

至於我同小巨人都有特別慶祝儀式，我地準備左一個美味午餐，有意粉、雞扒同雞翼 (嘩... 好似細個開大食會咁)


小巨人呢... 仲特別買左兩包卡樂B薯片，食住慶回歸! 回歸快樂!!