Week 30 - 休息休息

有時候半夜瞓唔著，都係諗住公司既事，情況越來越嚴重。好想休息一下，希望放低工作可以令毛毛快d長肉。

醫生叫我今日去見佢，傾左一陣，佢就話試下放一個星期假。醫生又話，如果毛毛體重向下發展，就要早產同開刀。真係驚驚地... 所以我要聽聽話話好好休息。

假期第一日，我去左搵蘇太太飲下午茶。蘇太太好耐無見我，太興奮所以不斷講野。我已經叫左佢唔好一邊行樓梯，一邊同我講野 (因為又落緊毛毛雨)，令我分心... 最後，我真係跣低左。好彩係pat pat先落地，但係已經嚇死。

湊毛毛既事竟然有轉機，真係多得蘇小弟幫手(口)。蘇太太有可能出山，不過仲要等下回分解。

友誼永固

小學同學們又出來聚一聚。

難得係見到我同小影既幼稚園同學兼鄰居，我地諗返起細個既點點滴滴，原來已經廿幾年之前既事。仲有細個出左名頑皮既奀皮仔同學，竟然已經係三個小朋友既爸爸!!!

小影話，估唔到紀錄冊上最行貨既一句「友誼永固」真係可以成真。今晚好開心!

Week 29 - 又掃貨

自從成日去淘寶之後，好耐都未試過現場瘋狂掃貨。

今日約左利是去佢公司開既bb倉買野，因為公司係做出口既，所以品質一流，拎上手已經知道。而且仲係六折價錢，真係無理由唔瘋狂掃貨!

始終，有野晌手慢慢揀既感覺係無可取代。

毛毛既fashion show:

出外靠朋友

阿姐生日，小神童約左一姐、柏師奶同我慶祝一番。

席間大家當然對毛毛研究一番，佢地意見一致，就係要毛毛食多d野。柏師奶話我湯水少，要同佢個湯水鋪老闆朋友幫我打點下。一姐知道我唔知比邊個湊毛毛好，話幫我問下教會既教友。阿姐又叫我抖下，唔好成日諗公司既野。

聽完佢地既說話，真係好感動。

返到屋企仲surprise，因為小巨人自己揀左份禮物比毛毛... 係Baby Pooh，好靚呀!

努力工作

今日又返大陸，個個都話咁辛苦，做咩仲要返上去? 其實我唔覺得辛苦架，真係睇下個人點睇。前幾日，總係覺得唔舒服、好論盡咁，但係今日走來走去，反而覺得自在好多。

依排覺得晌大陸做野開心d，同同事們得閒講下做野既事，又傾下計、講下笑。呢d野，全部晌香港都唔可以做!

又拎左好多野返屋企。等左好耐，終於到手:

蘇碧又去花旗國探契仔們，我買左d書比佢地，又係好抵:

Week 29 - 特別檢查

難得可以插隊睇醫生，死都要等，不過一等就兩個鐘。

醫生睇完報告就話:「無事呀! 無事呀!」佢地話毛毛依家係細碼，咁樣仲好，第一胎易生d。同埋私家醫生成日嚇人架，有咩野事就叫人去醫院。醫生同姑娘仲叫我唔駛太擔心!

依家兩個星期後，就去醫院照多次，睇下有咩野進展。我都唔知邊度先o岩啦! 個個講既都唔同既... 呢幾日左撲右撲，好攰呀!

(今日醫院門診又係好多人，今次姑娘們終於出聲，叫陪人睇醫生的起身讓坐。但係唔知點解有人仲係若無其事，真係好衰!)

Week 29 - 又去醫院

毛毛既事，今日當然即刻仆去醫院，個護士長好好人，立即比我約聽日見醫生。希望無事啦!

我同同事們講起，好似嚇親佢地，不過我仲同佢地講笑... 毛毛雖然瘦d，但係腳腳有力，試下比我伸一腳就知道。

因為我明白，我要堅強d同保持心情開朗!

Week 29 - 低位徘徊

懷住興奮心情去覆診，因為可以見下毛毛。點知努力狂食左一個月，毛毛體重仍然晌低位徘徊，係細碼bb。照埋超聲波，今次仲「考」第五名... 心情超低落。

醫生話最怕係毛毛體重如果下降，即係胎盤內生長環境唔好，佢吸唔到營養，就要早產。(嘩... 嚇死人咩!) 醫生好細心咁再幫我檢查，睇下有無問題，不過都無咩發現。不過就更正去第10位，都係warning架啦。

醫生寫左信比我去醫院，睇下有無檢查可以再做。我同小巨人都好擔心...

「毛毛，你食多d野啦!」

Week 29 - 飲糖水 (2)

第二次飲糖水，又係要好早去到醫院。我今次叻左，約左下晝去睇張醫生，可以放假一日慢慢瞓!

飲完糖水，真係會頭暈暈又想嘔，上次以為係咁啱，今次我知唔係啦! 不過死都要忍，因為嘔左一啖都要第二日從頭黎過! 同埋今次姑娘抽血手勢麻麻地，抽唔到又要拮多次針... 又要忍!

終於走得... 極速食完個早餐，返屋企喪瞓! 希望電話又唔好晌啦!

兒童樂園

劉生屋企，又化身成兒童樂園! 如果去左「小巨人之家」，應該無咩野可以招呼班小朋友，因為我地屋企係無玩具架，哈哈!

今日好開心! 我地又晌劉生劉太度又食又拎啦!

今次終於影到合照，何太同簡太個肚都好大，我仲係無咩野睇呢! 大家成日問我個肚係真定假架...

小小劉生

何朣朣

簡康康

小劉生與何朣朣

Week 28 - 執輸

本來夏太琴日已經報料，話永安大減價，可以出擊買張high chair比毛毛!

我一直都好鐘意呢類餐椅，bb細個可以當搖搖椅，等大個d又可以當餐椅，用到4歲大，真係超抵呀!

但係，只不過係等多一日，等放假帶埋小巨人去睇。點知就係呢一日，所有款都賣晒，好搶手! 唯有等下次大減價。

夜晚仲同臻臻食飯，好開心! 佢臨走時，摸住小巨人肚腩講:「bb, bye bye!!」哈哈哈!

Week 28 - 特診

身體有點小毛病，下晝真係有衝動跑去睇急証。

好彩最後知道只係小事，我仲見到醫生「冷笑」。不過醫生好奇怪，佢話如果開藥，有機會對bb有影響。講到咁，係人都唔敢食啦! 佢仲問我食唔食... 真係吹脹!

晚上特診盛惠五佰大洋，當做買過安心!

Week 28 - 醫院檢查 (3)

第三次去醫院覆診了。

次次去醫院，排隊時間又長，人又多。最厲害係唔知點解d準爸爸們，見到咁多腹大便便既準媽媽，係都唔會讓位，仲要唔比人坐。見到呢d情況，我就會好炆! (唔係話我自己，因為我個肚只係好細。)

見醫生又係唔過10分鐘，小巨人叫我問醫生，我地點知毛毛個size正唔正常，醫生只係話:「你個肚圍ok，唔駛擔心!」。查實醫生，你又點知bb晌入面有無事架呢??? 而且個醫生，連佢講咩我都聽得唔太清楚，佢把口好似唔願開咁...

唉... 有時真係想放棄唔去政府醫院。(不過今日最好係，可以同夏太同食午餐同蛇左半日行街街!)

Week 27 - 繼續淘寶

呢個星期繼續瘋狂淘寶，樂而忘返，連個blog都有點荒廢!

不過今次竟然漏左一件，人地過左海就神仙，當然好難追返。好彩只係十元八塊，就當手續費好了。

仲要多得同事挨義氣，一齊由深圳拎返香港。真係辛苦晒... 我依家返大陸office，真係要準備個大大大袋至得!

毛毛又有禮物收啦! 真開心!

Week 27 - 精打細算

一向對數字都不特別敏感，錢銀上就更加了。不過自從毛毛出現左，買每一樣野，邊度有減價、幾時買、邊樣抵，我都先做好功課。

呢個星期，初生bb尿片做特價，用埋coupon計落只要$20一包，好抵呀! 所以... 我一個人「的」左四包尿片返屋企。

以前成日覺得「駛唔駛咁誇張?」、「咁快買做咩?」... 真係今時唔同往日。

Week 27 - 換褲

今日又立定決心做另一件事，就係換晒d褲啦!

大家都好驚訝我仲著住平時既牛仔禈，不過其實唔係太好，對毛毛生長唔係幾好。所以呢幾日已經決定換晒佢地! 本來我諗住要揀好耐，點知任務20分鐘內火速完成。

好野!

開心生日會

一姐生日會又黎啦! 最緊要大家年年都咁開心!

今次仲有特別嘉賓財爺參與，令氣氛好熱鬧。我好鐘意同佢傾計，有正經的，又有攪笑的。最勁都係佢係一個世外高人，對掌相好有研究，淨係聽都值回票價。

我今次無比財爺「研究」呢... 因為覺得依家生活已經好好，我好滿足!

仲有我至愛既蛋壽司，勁開心!!!

Week 26 - 瘋狂淘寶

之前都有諗過上網睇睇bb野，呢個5月終於的起心肝，做晒功課。琴日確認訂單，今日晌深圳office已經收貨啦。真係快、靚、正! 最緊要係勁平...

今次第一炮，買左口水肩，因為之前見阿boo既口水肩好可愛，令我好深印象，夏太就推介我呢個牌子(cater's)。收到之後，真係全部都好靚，開心到我睇完又再睇!

依家成日諗住要瘋狂淘寶!

花生雞腳湯

又黎花生雞腳湯，好味!

依家訓練到小巨人煲得一手靚湯。