神聖任務

在秘密基地悶左一日，不過今日我有很多神聖任務，就是等待我地o既新成員進駐...

電視機... Ready！ 電視櫃... Ready! 鞋櫃... Ready! 廳櫃... Ready! 出黎的效果比我預期中還好喔! 就連我地之前最擔心的電視櫃都造得不錯，配上我們o既新電視，簡直very good! 我地終於可以欣賞「溏心風暴」了(真係好掛住「得得地」，我已經成個星期無見佢啦!)。同小巨人懶洋洋的倘在梳化上睇電視，真高興!

原來做家庭主婦一d都唔容易，首先一定要學識打發時間，睇黎我仲未領略到呢d樂趣呢！

蒙古餐

為慶祝寶寶由法國返黎，馬田主管特別帶我地去吃喝玩樂一番。由於轉左工作岡位關係，我地依家已經係馬田主管o既客人，即係話我地食午餐可以食到幾多點都得了... 呵呵! (熱情o既馬田主管真係好好人呀! 還記得我美國之行都係多得佢照顧。)

由於馬田主管係蒙古人，所以一知道有好味o既家鄉菜，就要帶我地去試試。計起黎，我都係第一次食正式o既蒙古餐。餐入面o既主菜都係以羊肉為主，初時我都怕一陣「羶」味，但係一試入口，真係好好味。特別係切得薄薄o既涮羊肉... 好「正」呀! 仲有菜菜醋味沙律、溏心皮蛋、燒羊排、自家制綠啤同黑啤都令我好難忘呢!

「乾杯」之後又「乾杯」! 估唔到只係食個午餐都令到我high high地呢!

為什麼？

第一次穿起它的時候，
為什麼沒有預期中的興奮？
為什麼？為什麼？
可能很少機會看到自己這個樣子...　
看到我『力的表現』，什麼心機也沒有了，唉...

不過我仍很期待著正式出來的效果！
希望不要太差就好了，
擔心ing...　

第一天

今日係我地第一晚入主秘密基地o既好日子。

有舒服大床、有新鮮出爐大衣架、有托得起小巨人大腳梳化、有自家制custom made書台、有滿地小巨人的污糟衫，仲有兩個執屋執到好累，晌10蚊店掃貨掃得好開心的傻人！

仲未睇到可愛米老鼠大戰污糟小新... Hey，我絕對唔會比呢件事發生架！污糟小新休想埋可愛米老鼠身邊... 呵呵呵！

山頂半天遊

原來我o既工作仲包括做外國同事們o既導遊兼領隊... 由於法國同事「喪皮耳」第一次黎香港關係，我做左一個星期妹仔之外，今日仲客串做左半日導遊，等外國朋友睇下我地香港靚靚一面啦！由於時間關係，我地只可以去到一個地方，就係山頂。嘩，竟然可以偷左半日工作時間出去玩，哈哈！

裝修過後o既凌霄閣可以比遊人上到項層欣賞風景，所以真係180度全面飽覽香港。同事都好好彩，今日無再落大雨之餘，更加無煙霞，天氣好到不得了。不過攪到「喪皮耳」變左「喪標汗」...

搬出這天地

今日o既公眾假期來得正好，小巨人終於決定搬離大埔啦!

包租婆當然好唔捨得小巨人呢個極好品租客，話晒交租有早無遲，連冷氣壞左都自費維修! 臭臭o既廁所、污槽o既浴缸、黑蚊蚊o既廚房、滿地雜物o既大廳...再見啦! (好似最開心o既係我wow!!)

但係由於小巨人唔想麻煩各方好友，所以只有佢一個人擔當苦力o既工作，而我就係指手劃腳o既「篤」導員加看更。好彩好好人司機叔叔睇唔過眼幫埋一份，終於無驚無險去到秘密基地! 救援隊隊員一號(巨人爸爸)、二號(巨人媽媽)同三號(蘇小弟)亦準時到達... 見到佢地o既時候，即時令我鬆一口氣!

我地當然唔可以待薄救援隊，即刻出發去食餐好o既!

暢飲今晚夜

今日係蒙蒙同寶寶o既生日派對，大家因為聽日係假期關係，所以可以開懷暢飲。

今次地點係灣仔一間酒店o既VIP房，有美食之外更加有卡拉OK，高歌的高歌，暢飲的暢飲，大叫的大叫，大家都玩得好開心。難得今日客串攝影師o既侍應哥哥無比我地o既忘我狀態嚇倒，仍然可以影到一張我地讚不絕口o既靚靚大合照！好野！

開心時間

琴晚相約左鬼仔出來聚一聚，因為佢有好消息，就係佢已經有幾個offer等緊佢了，仲要全部都係大公司。都話佢打不死架啦... 果然係勇士！

所以我、柏師奶、他他見到鬼仔o既時候，佢心情好好，大家都不斷講大家近況，當然仲有gossip gossip！我地講笑話，就算佢無野做，都可以寫本書搵啖飯食，書名都已經改好左，叫「鬼佬 in Hong Kong」... 哈哈！鬼仔都有關心到我同小巨人o既project進度。Hey, 佢係我only鬼佬friend，一定預埋佢啦！突然又比我知道左一個唔係幾好o既消息，令我對工作上有d擔心...

不過唔理啦！玩左先算！

嘩哈哈

先頭部隊:

洗衣機係唔同乾衣機架...
洗衣機洗完ｄ衫係唔會滴水架...
去超級市場買野一定要對清楚價錢牌架...
廁紙好貴（絕對唔係十蚊一條）架...
唔係人地叫你比幾多錢就幾多架...
不如你睇多幾集師奶兵團學野啦！

你就好啦，細個唔洗做家務。
不過，你真係好攪笑呀... 嘩哈哈！

後勤人員

監場活動

馬不停蹄的我們，今日又匆匆忙忙地趕到秘密基地進行監場活動。

本來時間分配好，裝燈同送來大大大床o既時間，但係我地都係晌間吉屋度呆等左幾個鐘。結果，佢地一如我地所料，好似約埋咁一齊黎到。

先講大大大床，外型就係我地要求的，簡簡單單，所以好難出錯。不過手工就差得很，竟然比我想像的還要差。現實都係殘酷的，本來我地對負責人阿伯一知半解o既態度已經好有疑問，依家抱住最後一絲o既希望都幻滅了。不過我地無退返去，因為以佢地交成咁樣，再造都唔會有咩改善。佢成為左小巨人最大歡樂泉源，因為小巨人會對住大大大床不停笑！唔通佢係刺激過度... 傻左?

輪到ｄ燈，老細姐姐之前話咩都得，點知個師傅又話咩都唔得。我地梗係由得佢講之餘又同老細姐姐投訴啦！結果我地要「專程」落去換... 唔係呀化？咩都無貨？下次換完都有問題，我一定出聲呀！（因為今次全程由小巨人發言，我就全程黑面。）



咁樣攪一攪，已經係朝11晚6了，我地仲迎接左巨人爸爸媽媽姐姐到訪，齊人去食飯。好野，終於有野食啦！

舒舒服服

每個星期六都係我同小巨人o既shopping day，因為我地有好多野都仲未買。

今日就決定左床褥，係一張好舒服o既床褥...

備有雙層軟墊設計，令您彷彿沈睡在片片羽毛上般柔軟舒適，為尊貴的您提供更輕柔舒服的睡眠享受。床褥布料特別經過防污處理，既能保持布料舒適透氣，更能有效減低床褥被不慎弄污的機會，保持床褥衛生清潔，歷久常新。採用獨有的至尊彈弓系統，其開放式末端設計，能準確回應不同方向的任何壓力，承托力特別均勻，有效保持脊骨健康。配合回彈力特別持久的優質天然乳膠墊層，能更有效地依據人體曲線體貼您睡眠時的身型，為您帶來更貼身的睡眠感覺。

價錢就... 好貴呀! （令人作舌!） 連我地見到服務我地o既sales姐姐晌度偷笑（因為有大單呀o麻）。不過希望有左佢，小巨人晚晚都可以發個美夢!

聽日要去秘密基地做第一次監場活動啦!

悲傷有時

今日知道左一個非常壞o既消息，希望蘇碧同米高都不要傷心。
我會支持你地架... 一定要樂觀面對先可以打底病魔!

大契話:「哭有時、笑有時、歡樂有時、悲傷有時。」
珍惜眼前人!

一個人在東京

返黎啦! 返黎啦! 蘇小弟返黎啦! 佢竟然去左日本自遊行，仲係好大部分時間只有自己一個人，佢真係一個人東京遊遊蕩蕩!

因為佢係家中最細，從小都係被人照顧，所以好難想像佢可以做到呢件事。其實轉捩點應該係佢上年去完英國探小健之後，見完世界其他地方之後，感覺佢真係大個仔了... 其實我自己都未有膽一個人晌東京四圍走(上次有小蒲陪我就唔同)，因為我係一個方向白痴。哈哈，不過如果我好似佢咁有三百蚊超平機票，都要去蕩下先得!

最重要係，佢每次出閣都會買禮物比我喔! 嘩哈哈! 今次就係無印良品靚袋一個... 我好鐘意呀!

細佬，多晒!!!

媽媽節

今年的媽媽節我地都無咩特別活動，因為我同小巨人要四周搜羅秘密基地o既用品。

「呢個唔錯...o個個又好似幾好咁」呢個念頭不停晌我腦內打轉...真係令人眼花撩亂! 我地大大話話試左十幾張梳化，問完人地個價錢之餘，又要試下好唔好坐。終於比我地揀到啦! 仲係一個超級優惠價，比其他舖頭竟然相差五份一! 勁呀! 不過仍未完成呢個偉大工程... 床褥、書櫃、衣櫃呢幾個組別o既候選佳麗仍然等緊我地評分! 累累累!

不過都唔可以唔記得「媽媽節快樂」!

沒精打彩

這幾天因為公司的事，令我整個星期都沒精打彩! 犯錯、犯錯、又犯錯，自己犯的係我錯，關我事的又係我錯，唔關我事的都係我錯... 真係好想大喊一場，沒心機的一個星期!

心情惡劣的這個星期，令我只想到睡，所以每日的生活都是返工/返工/返工同睡/睡/睡，可以10點半睡到7點半，唔通我暗戀左周公子??

下一個工作天又是新開始!

什麼都怕

我什麼都怕...
我怕黑，
我怕高，
我怕熱，
我怕死，
我怕鬼，
我怕痛，
我怕悶，
我怕痕，
我怕瘀，
我怕嘈，
我係一個無膽鬼 >_<

小巨人，你幾時返黎呀?

腳骨力

今日天氣好好，但係炎炎夏日好似又迫近，「熱死人啦」!

今日行程緊密，特別任務係買門鎖同睇燈。經過一杯McCafe Flat White同四個圈行程之後，買鎖任務終於完成。跟住睇左一陣燈，就返去搵巨人爸爸同巨人媽媽食飯。夜晚去埋秘密基地之餘，又繼續晌荃灣睇燈，行程實在非常充實!

我地發現，同一盞燈晌旺角同荃灣竟然相差一倍有多...
旺角A店-$380 (幾得意WOW! [但係好貴!])
旺角B店-$290 (特價WOW! 睇多幾間返黎買! [之後趕住走])
荃灣C店-$220 (WOW! 好抵呀! [都係無買])
荃灣D店-$160 (WOW... [無野講])
真係用多d腳骨力先搵到平靚正o既野呀!! 但背傷關係，我發現自己越黎越唔行耐了。只係行一陣又會痛，操勞得滯又會痛，揹重野又會痛，又會發脾四，唉!

返到屋企，唔知係唔係又曬親，又暈又想嘔，真係渣... 不過蘇太太又話我知，公公o既事解決了。芝姐姐終於留返晌度，一天都光晒! yeah!

度身訂造

今日秘密基地進展理想，我同小巨人亦己經為佢度身訂造左鞋櫃同電視櫃，仲有蘋果師傅超值推介廳櫃一個。

由於電視櫃屬於我地天馬行空，蘋果師傅亦有小小「R」頭，不知不覺我地由4點傾到11點，估唔到竟然傾左咁耐！好彩師傅亦好有耐性同我地一齊研究，就連我地留意唔到o既地方亦一一提點。比起之前去搵負責人老頭o既經歷好得多了。不過，因為無其他相似o既產品對照，所以都未知完成品係點樣。希望唔好有「驚嚇」效果就好了！

原來我地傾到連未食飯都唔記得，所以晚餐特別好味。完成任務之後，又拖住疲累o既身體返到大埔，準備明天繼續作戰！

三十而立

蔡生就黎生日了，作為佢honey的蔡太梗係要同肚入面o既小baby同準爸爸慶祝啦！因為今年係蔡生三十而立ｏ既好日子，我地同學們當然要為佢助慶...大大聲的晌青衣城高唱生日歌！

睇黎稻香o既侍應姐姐都比我地熱情所感動... 幫我地影相時都有d手震喔！

愁眉苦臉

今日返到屋企，發現蘇太太愁眉苦臉，原來公公又同芝姐姐開大片。芝姐姐都係決定要離開我地了... so bad!

我都知道性格剛烈o既公公，發起火上黎實在唔係人咁品。不過佢只係口硬心軟，其實好似一個小朋友咁，要人「乙水」又要引人注意! 只可惜呢d事，屋企人就好容易忍讓下就算。不過如果人地受你二分四，又好難講。

所以蘇太太考慮要送公公去老人院，其實我實在不情願。又怕公公去到o個度沒人理，又怕佢唔適應，可惜以佢依家o既情況，就一定要有人廿四小時晌佢身邊。

呢件事仍待解決，但已經令我好唔開心... 唉!

左撲右撲

今年o既勞動節假期真係好勞動，我地為左秘密基地左撲右撲，真係行到我雙腿發麻...

最後決定唔去原先一間傢俬舖訂其他傢俬了，只係訂左一張床。雖然浪費左之前度尺o既時間，但係同阿負責人老頭真係溝通唔到。(我都好少可咁火架!!)好彩只係訂一張大大大床，仲係無咩花款o個隻，唔係我一定噴血。但係，所有野又要重新開始了!

正當我地為進度不滯而煩惱o既時候，又比我地「撞」到心目中想要o既野... 真好! 希望星期六真係可以做最後決定啦!

秘密基地，等著我回來喔!